Потонатиот брод „Илинден“ ќе го извлекува хрватска компанија

Груевски вчера не кажа ништо за оставката на Јанакиески и за нападите на својот бугарски колега

Симеон Илиески

ОХРИД - Бродот „Илинден“ што потона во саботата и се удавија 15 бугарски туристи, најверојатно од водите на Охридско Езеро ќе го извлекува специјализирана фирма од Сплит, Хрватска. Според неофицијални информации, така вчера одлучила комисијата во која има по тројца експерти од Македонија, Бугарија и Хрватска. Веќе било испратено барање до фирмата која треба да ја извести комисијата за цената на зафатот за извлекување на бродот со поставување балони, техника која овозможува да се избегне опасноста од нови оштетувања на потонатиот брод.

Во комисијата, по подолги усогласувања, се определиле за ангажирање на хрватската фирма за да може бродот да се прегледа на земја и прецизно да се утврдат причините за потонувањето. Засега, неофицијално, како причини се наведуваат кинењето на сајлата од кормилото и пропелерите на бродот, претовареноста и новопоставената втора палуба, која влијаела на стабилноста на бродот.

По барање на комисијата, во понеделникот беа направени нови подводни видеоснимки и фотографии. Но, како што се дознава од членови на комисијата, тие не биле доволни за утврдување на причините за несреќата. Фото и видеоматеријали беа направени и во саботата, веднаш по несреќата, но поради заматеноста на водата, биле со лош квалитет, па затоа било побарано да се направат нови.

Во истрагата што е во тек се споменува дека вина за потонувањето ќе се бара и од германската фирма „Лојд“, која го прегледала бродот и дала лиценца за пловидба, притоа не земајќи го предвид фактот дека новоизградената втора палуба може да влијае врз стабилноста на пловилото. Вина веројатно ќе се бара и од Капетанијата на македонските пристаништа, која како надлежен орган издала дозвола за пловење со важност до мај 2010 година.

Засега не е утврден датумот кога ќе биде изведена операцијата на вадење на бродот од водите на Охридско Езеро, кој се' уште стои стотина метри од брегот кај автокампот „Елешец“, но се верува дека извлекувањето ќе треба да започне веќе во наредните денови. Експертите сметаат дека операцијата треба да се изврши поскоро, бидејќи може поради силни струења или бранови, бродот да се помести и да има нови оштетувања кои би ја отежнале истрагата и утврдувањето на причините за потонувањето.

Кај охридската јавност во недостаток на официјални информации се зборува дека листата на оние што се одговорни треба да се прошири зашто потонувањето на бродот „Илинден“, изграден во далечната 1924 година во Германија, директно ќе влијае врз имиџот на Охрид како на туристички центар. Се инсистира конечно да се отвори и прашањето за безбедноста во одвивањето на езерскиот сообраќај, зашто ова лето имаше неколку несреќи во кои беа изгубени човечки животи. Покрај 15 жртви, бугарски туристи во несреќата со потонувањето на бродот „Илинден“, ле��ово во судир на два глисера настрада жена, две момчиња се удавија при превртување на педалинка, а скутерџија во Струга повреди 12-годишно девојче.

Отворени остануваат и повеќе прашања поврзани со водењето на истрагата и вклучувањето странски државјани во текот на постапката. Се проблематизира и емитувањето подводни снимки од потонатиот брод само на една телевизија, видеоматеријал што е снимен со дозвола на надлежен орган и исклучиво за потребите на истрагата. Правни експерти сметаат дека истрагата треба да продолжи според нашите закони, без притисок и вклучување неовластени лица, без разлика на нивните функции или добри намери.

По повод трагичната несреќа во Охридското Езеро, во амбасадата на Република Бугарија во Македонија е отворена книга на жалост. Во книгата се потпишаа претседателот на државата, Ѓорге Иванов, премиерот Никола Груевски, претседателот на Собранието, Трајко Вељаноски, министерот за надворешни работи, Антонио Милошовски, поглаварот на МПЦ, г.г. Стефан, претседателот на СДСМ, Црвенковски, и многу граѓани.

Премиерот Никола Груевски вчера не сакаше да даде одговор на прашањата кои се однесува на нападите што ги изрече неговиот бугарски колега Бојко Борисов, како и за оставката на министерот за транспорт и врски, Миле Јанакиески.

Потонувањето на бродот „Илинден“ се' уште е топ-тема во домашните и во странските медиуми. Во Охрид останаа бројни екипи известувачи од домашните и од странски медиуми. Неколку снимки и видеоклипови што ги направиле лица кои случајно се нашле на местото на несреќата беа продавани на домашни и на странски медиуми по цена од 2 до 5 илјади евра, а се појавија и бројни шпекулации во некои бугарски медиуми дека постои сомневање за терористички акт.

На ваквата атмосфера во прилог и' оди бавноста во утврдувањето на причините за потонувањето на бродот „Илинден“ и затвореноста на надлежните државни органи кои се должни да даваат навремени и точни информации.