Русевски без трофејот во двојки во Египет
Предраг Русевски остана без трофејот во двојки на тенискиот фјучерс во египетскиот град 6 октомври, со награден фонд од 10.000 американски долари. Тој и неговиот партнер Мохамед Мамун од Египет беа втори носители, но во финалето загубија во тај-брејк со 6-4, 4-6, 13-11 од Мароканците Мунир ел Ареј и Талал Уахаби.
Првиот македонски рекет, кој е 813. на АТП-листата, и неделава продолжува во Египет, и тоа на фјучерсот во Суец, кој се игра на земјена подлога и е со фонд од 10.000 долари. На главниот турнир можно е да му се придружи репрезентативниот колега Димитар Грабулоски (1016.), кој во вчерашниот решавачки квалификациски дуел требаше да се сретне со Словенецот Алјаж Бедене (1365.). Грабулоски, кој е осми носител, досега ги совлада Адам Кос од Чешка со 6-1, 6-0 и Јенс Хендрикс од Белгија со 3-6, 6-1, 6-2.
Илија Мартиноски (843.), Шендрит Деари (1724.), Томислав Јотовски и Васко Здравкин не успеаја во квалификациите за фјучерсот од 10.000 долари во Анталија. Најдалеку, до третото од четирите квалификациски кола, стигна третиот носител Мартиноски, кој загуби со 6-1, 7-5 од Лауринас Григелис (1527.) од Литванија. (Р.Д.) |
