„Бришачот“ збриша 57 местачи на сообраќајки

За измами со фингирани сообраќајки и наплати на штети, приведени се дури 17 полицајци

Љубиша Станковиќ


Голема група полицајци, раководители на увидни екипи и виши крим-техничари од Одделението за увид се приведени во последната акци��а наречена „Бришач“, со која МВР разоткри низа измами со фингирани сообраќајќи со цел да се обезбеди наплата на штетите од осигурителните компании. МВР кривично ќе гони 57 лица, од кои се уапсени 29 и вчера беа изнесени пред истражен судија. Двајца се во бегство, а останатите ќе бидат повикувани со покана.

Според досегашните сознанија, групата работела од 2007 година досега и постојат докази за местење дури 13 сообраќајни несреќи. Откако учесниците во сообраќајот ќе обезбеделе автомобили со оштетени делови, ги местеле како да се случила сообраќајка. Претпоставките се дека на тој начин ги оштетиле осигурителните компании над два милиона денари или за над 30.000 евра.

Маскирани припадници на МВР вчера околу 14 часот започнаа со спроводот на своите колеги и другите осомничени во Кривичниот суд. Полициската акција која носи оперативно име „Бришач“, според МВР, е само продолжение на отворената интензивната истрага што е започната уште во текот на 2007 година, а се однесува на пријавување лажни сообраќајни незгоди на подрачјето на Скопје.

Иако низ судските кулоари се шпекулираше дека меѓу осомничените има и адвокати, лекари и вработени во осигурителни компании, засега нема потврда за такво нешто.

Од досега обезбедените докази било констатирано дека пријавените од август 2007 година до март оваа година речиси на идентичен начин фингирале сообраќајни незгоди. Така, службените лица од МВР, најчесто раководители на увидна екипа во Одделението за вршење увид на сообраќајни незгоди и виши крим-техничари за сообраќај, со другите пријавени физички лица поставувале возила во положба како да учествувало во сообраќајна незгода. При пријавување материјални и нематеријални штети, а врз основа на лажни записници за извршен увид на местото на настанот и скици, барале паричен надомест од осигурителните компании.

Пријавените физички лица откако претходно ќе обезбеделе и ќе подготвеле автомобили со оштетени делови, ги местеле возилата како навистина да се случила сообраќајка, а потоа ја пријавувале „незгодата“ во полиција. Потоа увидна екипа излегувала на местото на настанот и составувала лажен записник дека навистина се случила сообраќајна несреќа.

Потоа ваквите записници биле носени во осигурителните компании, каде што било поднесувано барање за надомест на штети од каско-осигурување на возила, осигурување од автоодговорност, материјални и нематеријални штети. Врз основа на тоа, им биле исплатувани штети.

Од МВР велат дека разликите од она што било наведено во записникот за извршен увид и реалната ситуација била потврдена со вешт наод и мислење изработен од вештак од Бирото за судски вештачења.

Постојат одредени сознанија што упатуваат на тоа дека некои од инволвираните пријавувале и телесни повреди и дека за реализација на намерите била злоупотребена и службата за Итна медицинска помош, бидејќи им била обезбедувана и медицинска документација, а потоа од Националното биро за осигурување било побарувано наплата на нематеријална штета.

Во една од ваквите фингирани незгоди, еден од учесниците, заради докажување наводни повреди, со себе зел лице кое веќе имало физички повреди. Тој го однел лицето во Хируршката клиника каде што врз него бил извршен преглед, но се' се водело на името на лицето што ја смислило измамата. Со вака обезбедената медицинска документација, тој освен материјална штета за возилото, наплатил и нематеријална штета за неговите наводни телесни повреди.

Случајот наречен „Бришач“ МВР му го предаде на скопското Јавно обвинителство, а кривичната пријава се однесува на злоупотреба на службена положба и овластување, фалсификување службена исправа, помагање, осигурителна и обична измама.