Поглед

Нека дојде Лилето

Иван Боjаџиски

Десет месеци 700 жители од Бурилчево и Кучичино во општина Чешиново - Облешево се отсечени од светот. Во декември лани големото невреме го урна 60 метри долгиот мост кој овие села ги спојува со магистралата Кочани - Штип, а од таму и со „остатокот од светот“. Но, од моментот кога останаа без мостот на Брегалница па до денес, наместо решение, селаните доби��аа само ветувања дека работата ќе се среди.

Откако им стана јасно дека мостот нема да го биде ниту во блиска иднина, деновиве жителите го блокираа магистралниот пат. И јасно ставија до знаење дека оваа Влада мора да ги исполнува предизборните ветувања. Едно од нив беше дека мостот итно ќе биде оспособен.

Меѓу оние што ги убедуваа селаните дека својот глас треба да го дадат за актуелната владејачка коалиција која ќе им ги реши проблемите, беше и претседателката на партијата Демократска обнова на Македонија, Лилјана Поповска. На основа на таквите големи ветувања, токму во оваа општина ДОМ доби еден од двајцата градоначалници во државата. Поповска со соработниците беше најголемиот агитатор и најмногу им ветуваше на луѓето од овој крај за време на изборите.

„Нека дојде Лилето“, рекоа дел од протестантите за време на блокадата на патот. „Нека дојде како што доаѓаше пред изборите и нека ни каже в лице дали заслужуваме да имаме мост и контакт со своите ниви, со работните места во конфекциите во Кочани и со светот кој функционира од другата страна на Брегалница“, гласеше пораката на жителите од Бурилчево и Кучичино.

Поповска досега се нема појавено меѓу овие луѓе. А тие, желно ја очекуваат. Да им каже дали 200.000 евра, сума потребна за поправка на мостот, се многу пари и дали овие граѓани на Македонија имаат употребна вредност само за изборите.