Платите ни се многу повисоки од минималната

Штипските текстилци ги демантираат информациите дека кај нив платите се екстремно ниски, до 6.000 денари

Иван Бојаџиски



Штип - Менаџерите на штипските конфекции жестоко реагираат на зачестените информации во кои на јавност�� и' се сугерира дека во овој сектор се исплатуваат ненормално ниски плати, од пет до шест илјади денари. Менаџерите од градот на текстилот тврдат дека се работи за големи бесмислици, односно за информации што не се проверуваат на вистинското место, бидејќи работите не стоеле така како што се информирала јавноста.

Владо Нетков, сопственик на конфекцијата „Милано“, вели дека со ваквите лаги треба да се прекине еднаш и засекогаш, а ако има конфекции што исплатуваат толку мали плати, нивните имиња јавно да се објавуваат кога се коментира состојбата во текстилната индустрија.

„Не може се' да се става во ист кош. Тврдам дека во Штип, град со седумдесетина конфекции во кои работат 7.700 работници, во 95 проценти од нив платите се во границите на нормалата. Не знам за конфекција во која 99 проценти од вработените имаат плата помала од 10.000 денари, а просекот во оваа индустриска гранка изнесува 12.000 денари, иако, барем во мојата фирма, има работнички што заработуваат и до 14.000 денари“, вели Нетков.

Тој се осврнува и на трипартитниот договор, со кој е постигната минимална плата од 8.050 денари. „Во текстилната индустрија не е проблем таа плата да се исплати, и се исплатува. Како бизнисмен со подолг стаж, се прашувам зошто е потребен период од дури три години за да почне да се применува Законот за минимална плата. Што е тоа за кое ние од бизнис-заедницата треба да се подготвиме во однос на исплатата на минималната плата? Мислам дека ќе беше многу логично овој Закон да почне да се применува веќе од првиот ден во 2012 година“, вели Нетков.

И Душко Зенделов, од најстарата штипска приватна конфекција „Штиптекс“, вели дека со таквите информации се нарушува интегритетот на менаџерите во конфекциите. Тој бара, кога веќе јавно се изнесуваат информации во однос на платите во овој сектор, вистината да се бара кај надлежните институции.

„Не знам кому му се потребни овие невистини што влијаат демотивирачки кај менаџерите на текстилните фирми и се поставува прашањето кои се мотивите за таквите негативни информации во однос на платите. Кај нас нема плата помала од минималната, која неодамна е договорена помеѓу социјалните партнери, а не верувам дека таква има во која било од посериозните конфекции во градот. Просекот ни е 12.000 денари. Лично мислам дека тоа не е многу, но текстилот е трудоинтензивна индустрија во која нема големи профити, а платите што се делат се одраз на таа состојба. Во однос на информациите за плати од 6.000 денари, ние само бараме јавно да се објави каде такви плати се исплатуваат, а не сите да бидеме ставани во таа негативна корпа. Кога се дават такви информации вистината нека се побара во УЈП, каде ние редовно, до 15 во месецот, поднесуваме налози за плати и придонеси по сите основи. Кој сака да ја дознае вистинската слика во однос на платите во текстилната индустрија, треба да се обрати на таа адреса“, потенцира Зенделов.

Економскиот аналитичар Стојче Самарџиев вели дека кога штипските конфекционери целата добивка би ја насочиле во секторот плати, тогаш штипските текстилци би имале повисоки плати за 3.965 денари. „Ако тоа се направи, тоа би значело дека фирмите не би имале можност за никаков развој. Тоа би бил чин на самоубиство, бидејќи конфекциите не би биле во можност да инвестираат во нови погони, технологии и работни места, што би било вовед во нивно конечно згаснување и губење на над седум илјади работни места. А дури тоа би било погубно за градот кој економски опстојува благодарејќи на текстилот“, вели Самарџиев. И Самарџиев тврди дека неточните информации за висината на платите кои се пласираат во јавноста можат демотивирачки да влијаат на таа бизнис заедница, поради што најдобро би било, кога такви информации се објавуваат, да се кажува и изворот на тие информации, но и конфекции во кои така мизерно се третира трудот на работниците, ако такво нешто навистина постои.