Мазе прва во велеслаломот во Зелден

Словенката во двете возења оствари предност од 42 стотинки во однос на второпласираната Катрин Цетел од Австрија

Тина Мазе победи на отворањето на Светскиот куп во алпско скијање, кој тргна со женскиот велеслалом на глечерот Ретенбах во Зелден. Словенката во двете возења оствари предност од 42 стотинки во однос на второпласираната Катрин Цетел од Австрија, чија што сонародничка Штефани Келе заврши трета.

Ова е 12. триумф за 29-годишната Мазе, која имаше предност од 79 стотинки во однос на Французинката Теса Ворли по првото возење, која не ја испушти во второто, кое доцнеше поради магла. И Ворли и бранителката на малиот кристален глобус во оваа дисциплина Викторија Ребенсбург, која беше трета по првото возење, во второто се соочија со намалена видливост на патеката, но таа не и' попречи на светската шампионка во велеслалом да го задржи налетот на Цетел.

„Си поставив високи цели зимава и имам намера да се борам за титулата во вкупниот поредок“, изјави Мазе, која забележа вкупно време од 2:31,41 минути и стана прва скијачка со три победи во Зелден по тие во 2002 и во 2005 година. Таа во минатата сезона не победи на ниту една трка од Светскиот куп, иако имаше неколку пласмани на подиумот.

„Ова е супер ден и супер победа за мене. Возбудливо е да се почне сезоната со ваква голема победа, посебно со оглед на тоа дека напорно тренирав летоска со мојата група. Ова симна голем товар од мојот грб“, додаде таа.

Мазе, која постепено напредуваше во генералниот пласман од Светскиот куп од четвртото место во 2009 година, преку третото во 2010 и второто лани, последен пат победи во Ленцерхајде во март 2011 година.

Цетел беше најбрза во второто возење, а нејзината репрезеднтативна колешка Келе го прослави својот најголем успех, искачувајќи се од 11. место по првото возење. И двете носеа црни ленти на рацете во знак на почит кон младиот колега од австрискиот тим Бјорн Зибер, кој загина во сообраќајна несреќа минатата недела.

Линдзи Вон, која победи во Зелден минатата година и која ја победи Мазе во трката за севкупен триумф во Светскиот куп во сезоната 2011/2012, по првото возење беше 12., а во второто падна откако ја „собра“ вратата со раката. Втората најуспешна скијачка во историјата пред почетокот на сезоната побара од ФИС дозвола да настапи во машкиот спуст што ќе се одржи во канадскиот зимски центар Лејк Луис на 24 ноември.