Светска банка во тап триаголник со СДСМ и Владата

Од Канцеларијата на СБ во Скопје велат дека Владата води мудри фискални политики и затоа обезбедуваат поддршка со поволни услови

Нина Нинеска-Фиданоска


Писмото на опозицијата до првиот човек на Светска банка ги разбранува духовите, што може да се заклучи од многубројните соопштенија што се пласирани по неговото јавно презентирање.

„Сме и' помагале на Македонија уште од 1993 и таа политика продолжува и сега. Сегашната Влада води мудра фискална политика и во поглед на буџетскиот дефицит и во поглед на јавниот долг“. Вака накусо може да се парафразира соопштението кое вчера Канцеларијата на Светска банка во Скопје го испрати до новинарските куќи.

Реагираше и Министерството за финансии, кое наводите на СДСМ за заемот од СБ ги отфрли и ги нарече лаги и манипулации што и' нанесуваат штета не само на Владата, туку и на државата и на оваа институција. Социјалдемократите, пак, вчера одговорија дека тие и' напишале на централата на СБ во Вашингтон, а не на Канцеларијата во Скопје и порачаа дека писмото – одговор од Светската банка не е и не може да биде одговор на нивното писмо.

Инаку, Канцеларијата на СБ своето соопштение го почнува со желба, како што вели, да ги разјасни работите по известувањата на медиумите за буџетската поддршка на Македонија од СБ.

„Од 1993 година работиме со сите македонски влади работи на подобрување на животот на луѓето преку активна поддршка на реформите за конкурентност и на другите реформски напори. Голем дел од оваа поддршка се и 14-те заеми за буџетска поддршка обезбедени во периодот 1995-2012, што и' помогна на земјата да напредува како во просперитетни така и во кризни времиња“, велат од банката. Потенцираат дека нивната поддршка во последниве години придонела за водечката позиција на земјава во рангирањето на Дуинг бизнис. И оддаваат признание за расчистувањето на долговите на јавниот сектор, проблем што се појавил во повеќето земји во регионот.

За претстојната буџетска поддршка тие велат дека со неа ги поддржуваат постојаните реформи. „Со тоа ќе се даде значаен придонес за обезбедување краткорочно буџетско финансирање под поволни услови додека трае тешкиот период на пазарите во еврозоната и ќе се поддржи обновувањето на растот на среден рок“, велат од Канцеларијата на Светска банка, додавајќи дека стабилниот и заздравувачки раст ќе и' помогне на Владата за мобилизирање на приходите и ќе ги олесни фискалните притисоци.

„Земјата има добра и долга историја на фискалниот менаџмент и Владата покажа фискална мудрост држејќи го буџетскиот дефицит во изминатите неколку години на строго дефинирано ниво од 2,5 отсто. Буџетскиот дефицит од 3,5 отсто е прифатлив за Македонија, особено бидејќи земјата во претходните години добро управува со своите јавни финансии. Јавниот долг изнесува 30,4 отсто од БДП, а вкупниот надворешен долг е 63 отсто од БДП што е во прифатливи рамки“, додаваат од СБ, објаснувајќи и дека остануваат посветен партнер на Македонија во нејзиниот натамошен развој, „низ заедничка работа и дијалог со сите чинители во земјата“.

Министерството за финансии во Скопје го нарече писмото на СДСМ „лаги и манипулации“. „Должност ни е да ја известиме јавноста за лагите и манипулациите кои политичката партија СДСМ ги изнесе пред јавноста во врска со заемот кој Македонија го доби од СБ за поддршка на развојот на македонската економија. Со изнесените клевети не и' нанесува штета само на Владата, туку и на Македонија и на Светска банка“, велат од кабинетот на Ставрески. Нагласуваат дека со заемот од 50 милиони долари ќе се финансираат повеќе клучни реформи и тоа развој на производството со висока додадена вредност, полесно преструктурирање на земјоделскиот сектор, подобрување на ефикасноста на трговската логистика и воспоставување флексибилност на пазарот на труд.

„Нелогично е како во СДСМ воопшто се сомневаат во одлуката која СБ ја донесе на 29 ноември годинава. Бордот на директори кои претставуваат повеќе од 190 земји членки, едногласно и' додели на Македонија заем од 50 милиони долари, кои се показател за довербата во земјава. Заемот е под најдобри услови: каматна стапка шестмесечен Еурибор, кој во моментот изнесува 0,61 отсто, со рок на отплата од 18 години и грејс период од 5 години“, велат од Министерството.

Кабинетот на Зоран Ставрески повторува дека Македонија има ниско ниво на долгот од 30, 6 проценти и е четврта најниско задолжена во Европа, а методологијата на пресметка на долгот е конзистентна со онаа на Еуростат и ММФ, па е несфатливо како за СДСМ Македонија по динамика на задолжување потсетувала на Грција. За најпарадоксално во реакцијата на СДСМ го сметаат фактот што голем дел од заемите на СБ всушност и' биле доделени на земјава во времето на владеење на СДСМ. „Поднесувањето на 159 амандмани и пишувањето на срамни писма до СБ е преседан во работењето на СБ со Македонија во овие дваесет години“, велат од Министерството, истакнувајќи дека „успешната соработка со СБ ќе продолжи и понатаму“.

СДСМ вчера возврати дека писмото од Канцеларијата во Скопје, не го сметаат за одговор на нивното писмо. „Соопштението на регионалната канцеларија на СБ во Македонија, не е и не може да биде одговор на писмото на СДСМ, затоа што ова соопштение е објавено уште пред нашето писмо воопшто да биде пратено во Вашингтон. Позициите на регионалната канцеларија нам веќе одамна ни се познати. Ние сме целосно свесни за значењето на СБ како стратешки партнер на Македонија од осамостојувањето па наваму и токму затоа писмото денес го испративме во Вашингтон до претседателот на СБ, господинот Јим Јонг Ким“, изјави вчера Зоран Јовановски, потпретседател на партијата.

Инаку, СДСМ вчера повторно одржа прес-конференција за задолженоста, на кој се истакна дека „власта 50-те милиони долари од СБ си ги планирала за зголемување на конкурентноста на ВМРО-ДПМНЕ на изборите во март, а не за подобрување на конкурентноста на македонската економија“.