Тетовец претепан до смрт

Двајцата напаѓачи го пресретнале Крсте Стерјовски (65) кај православните гробишта во градот

Тетово – Шеесет и петгодишен тетовец почина како резултат на брутален напад кој се случи во петокот во близина на православните гробишта во Тетово. Двајца напаѓачи во петокот го пресретнале својот сограѓанин Крсте Стерјовски-Дуда (65) и безмилосно го удирале со тупаници. Повредениот веднаш е пренесен во болница, но - вчера им подлегна на повредите. Двајцата напаѓачи во текот на вчерашниот ден беа уапсени и полицијата разговараше со нив.

Според полициски сознанија, напаѓачите се од тетовско Гермо и досега немале сторено поголемо кривично дело.

Според полицијата, се' се случувало во петокот во попладневните часови. Двајцата напаѓачи му се нафрлиле на својот сограѓанин, инаку повратник од Швајцарија, претепувајќи го крвнички. Тешко повредениот бил пренесен во тетовската клиничка болница, од каде што по укажаната лекарска помош, поради сериозноста на повредите, бил пренесен на скопските клиники. Вчера два часа по полноќ тој им подлегнал на здобиените повреди.

„Целото наше семејство живее во Швајцарија и сме со двојно државјанство. Татко ми пред половина година се здоби со пензија и дојде да живее во Тетово. Кај нас доаѓаше секои два месеци. Кога разбрав за случајот, јас веднаш допатував. Не можев ништо да разберам за причините за толку злобната физичка пресметка. Очекувам полицијата брзо да реагира, а за денес е закажана средба во швајцарската амбасада во Скопје“, изјави Александар Стерјовски, син на сега покојниот Крсте.

Кај семејството на починатиот сретнавме и жител на Шемшово.

„Доста време работев со Крсте. Ми беше најдобар другар и пријател. Го немав видено подолго време. Кога разбрав за трагедијата, веднаш специјално допатував. Што да ви кажам. Многу ми е жал за човекот“, ни раскажуваше Албанецот од Шемшово.

Крсте Стерјовски вчера беше погребан на градските гробишта во Тетово. Во поворката беа неговото семејство, како и голем број тетовци кои го познаваа починатиот како мирен и добар човек.

Тетовската полиција интензивно работи на расветлување на сите детали во врска со овој настан, особено и поради фактот што случајот е со меѓунационални димензии. (Г.Е.)