Претходен број

ЕДИТОРИЈАЛ

Пролетно изборно будење

Гордана Дувњак

Ете, го доживеавме и тоа. Во неделата имавме мирен и снежен изборен ден. Без инциденти, кршење гласачки кутии, украдени изборни материјали и избркани избирачки одбори. Без непотребни тензии на гласачките места, нервозно свикани партиски конференции на кои предвреме се обвинува за фалсификат и изборни сценарија. И, што е најважно, без пукање и човечки жртви!

Да не беа некои ситни неправилности, гласањето ќе поминеше речиси беспрекорно. Здодевно и без поголема возбуда, токму онака како што многумина посакуваа, особено по ланските катастрофално спроведени избори. Се покажа дека кога нешто се сака - може и да се оствари! Рака на срце, на ваквата изборна идила им претходеа многу домашни и странски предупредувања, како и укажувања дека не смееме како држава и натаму да се коцкаме со нашите европски перспективи.

Кажано со речникот на нашиот чешки пријател Мирек Тополанек, Македонија успешно го помина првиот дел од матурскиот испит. Треба уште да се потруди да не ја расипе оценката за две недели, кога ќе треба да се докомплетира и писмениот испит.

Многу фактори влијаеја на спроведувањето на еден ваков „нормален“ изборен процес. Партиските активисти беа „ставени под контрола“, полицијата, наместо да се стави во функција на одредени партиски врвови, будно ги следеше случувањата на сите проблематични црни точки. Сепак, најголеми честитки и овој пат заслужија граѓаните. Македонскиот електорат покажа зрелост и завидно ниво на интерес за остварување на избирачкото право и покрај лошото време невообичаено за првиот ден на пролетта.

И покрај сложениот изборен процес, кој подразбираше во еден ден да се организираат два вида избори: претседателски и локални, сепак, државното изборно тело не ги испушти конците од рака. Ако постоеја одредени забелешки околу нивната пасивност и нереагирање за периодот пред официјалната изборна кампања, на денот на изборите се покажаа будни. Државната изборна комисија демонстрираше невообичаена експедитивност во обработката и соопштувањето на првичните официјални резултати, што не остави простор за партиски манипулации.

Навистина, изборниот скор не е конечен, но не може да се пренебрегне големата резултатска надмоќ на владејачкото мнозинство на ВМРО-ДПМНЕ и на ДУИ. Поддршка, која се' уште не е поматена ни со негативните ефекти од економската криза, расипништвото со државните пари, скапите и јалови реклами, како ни со лошите политички потези на домашен и на меѓународен план. Владиниот кредит наречен „промени во 100 чекори“ сега дополнително е вкалкулиран и во градењето на локалната општинска архитектура, која цело ова време беше здушно потпомогната од извршната власт.

Владејачката коалиција предводена од ВМРО-ДПМНЕ освои 23 градоначалнички места уште во првиот круг, во водство е во повеќе градови, а има и завидна предност на гласови во трката за двете високи функции во државната хиерархија. На прагот е на освојување на двата толку посакувани трофеја: шеф на државата и прв човек на главниот град. Но, и на чекор кон добивање апсолутната власт, што носи уште поголема одговорност во непреченото владеење.

Аргументите на опозицијата останаа недоволно разбрани од избирачите, поради што нив допрва ги очекува ново соочување, но најпрво со самите себе. Левоориентираните социјалдемократи ќе треба да изодат макотрпен пат за да ги убедат граѓаните дека се вистинска алтернатива, која има идеи и решенија, а не е само политичка опција која знае да критикува.

„Македонија се буди зашто се отфрли транзициската политика, зашто им ја даде довербата на оние што ќе го задржат идентитетот и нема да го сменат името на државата“, изјави Влатко Ѓорчев во име на Изборниот штаб на ВМРО-ДПМНЕ. Прашање е само како владејачката партија ќе им го објасни овој свој ригиден став на своите партнери, од кои чека поддршка во вториот круг, а се определени за европска Македонија.