Претходен број

Во продажба евтиниот индиски „нано“

Најевтиниот автомобил во светот, од компанијата „Тата моторс“ чини само 1.500 евра

МУМБАИ - На пазарот е пуштен најевтиниот автомобил во светот - „нано“ од компанијата „Тата моторс“. „Нано“ чини само 1.500 евра и е пуштен на пазарот во Мумбаи, пред да почне продажбата низ цела Индија во следните 10 дена. „Тата“ се надева дека три метри долгиот и со пет седишта автомобил ќе биде доволно евтин за да охрабри милиони Индијци да ги заменат мотоциклите. Аналитичар на случувањата во автомобилската индустрија проценува дека ќе бидат потребни пет или шест години „Тата“ да почне да профитира од „нано“. Моделот „нано“ со четири врати има 33 кс на кочниците и 624 кубни сантиметри отвор во задниот дел. Основниот модел нема воздушни перничиња, клима уред, радио или сервоуправувач. Меѓутоа, на пазарот ќе излезе и полуксузна верзија.

Малку поголемата европска верзија, „нано Европа“ ќе се појави на пазарот во 2011 година и се очекува да чини приближно околу 4.000 фунти. Аналитичарите посочуваат дека ако автомобилот стане хит на домашниот пазар, „Тата“ можеби ќе се обиде да ги задоволи побарувањата. Причина за ова е што главната фабрика за производство на „нано“ во западната држава Гуџарат ќе има капацитет да произведе 250.000 автомобили годишно, но ќе почне со работа идната година. Во меѓувреме „Тата“ ќе биде во можност да произведе околу 50.000 автомобили „нано“ во постојните капацитети. Одложувањето се случи поради тоа што „Тата“ требаше да ги напушти плановите за производство на „нано“ во новата фабрика во источната држава Западен Бенгал поради спорот околу земјиштето купено од фармерите. Ова беше причината производството на „нано“ да биде одложено за шест месеци. Управниот директор на „Тата“,Рави Кант, изјави дека резервациите за автомобилот ќе почнат да се примаат на 9 април, и дека со ждрепка ќе се извлечат првите 100.000 лица кои ќе го добијат својот „нано“. Испораката на автомобилите ќе почне од јули. (Би-Би-Си)