Претходен број

Европскиот сон на Македонија замаглен во Германија

Германскиот докторант Антонио Милошоски и амбасадорката Улрике Кноц

Новата програма на германската канцеларка бара стопирање на ширењето на ЕУ, со исклучок на Хрватска

Тамара Грнчароска

Средношколската визија според германската амбасадорка во земјава, Улрике Марие Кноц, нема да ги наруши добрите билатерални односи меѓу Македонија и Германија. Кноц ја прогласи симулациската игра за можна реалност „ако се работи на политички план“, а тоа е дека Македонија до 2020 година може да влезе во ЕУ со ново име „Северна Македонија“, со нова македонско-албанска владејачка партија „Нова македонска партија“, како и тоа дека „албанското население ќе го зборува македонскиот јазик, што е случај и денес, а Македонците ќе го зборуваат албанскиот јазик што ќе го учат уште од детски градинки“.

„Македонија не очекува да има какви било промени во партнерските односи меѓу Македонија и Германија, која постојано не' поддржува и на политички и на економски план и е една од најзначајните партнери на нашата земја“, изјави вчера за „Утрински весник“, портпаролот на МНР, Петар Чулев, додавајќи дека во прилог кон тоа оди и соопштението од германската амбасада во понеделникот за изјавата на амбасадорката во кое се наведува дека „изјавите никако не ја опишуваат германската политика спрема Македонија“.

За германската политика спрема перспективите на Македонија поконкретно укажува усвојувањето на програмата на владејачката Демохристијанска партија (ЦДУ) во Германија за претстојните избори за Европскиот парламент, во понеделникот, во која партијата на канцеларката Ангела Меркел бара стопирање на приемот на нови земји во ЕУ на неопределено време, со исклучок на Хрватска.

Според Меркел, досегашните проширувања ја чинеле Унијата голем напор, па затоа сега ЦДУ заговара пауза на неопределено време. Меркел се изјаснила за децидно членство на Хрватска, додека за Турција рекла оти „тежнееме кон повластено партнерство“. За другите земји од регионот (н.з. вклучително и Македонија) Меркел рекла дека „се зачувуваат перспективите на пристапувањето“. „Сите знаеме дека сложената структура на Западен Балкан може да добие стабилност само со помош на европските перспективи“, изјавила Меркел, додавајќи дека „без европската перспектива понатамошниот развој не би бил позитивен“ и поради тоа „изборната програма на ЦДУ во тој поглед не менува ништо “.

Иако изјавата на Кноц, официјално, не ја отсликува политиката на Германија спрема нашата земја, нејзините зборови дека средношколската „визија“ на деца од Македонија, Германија и Франција, е убава визија за земјата и оти таа „не е нереална, не е утопија и може да се направи и пред 2020 ако се работи на политички план“, заедно со новата програма на ЦДУ за непроширување на ЕУ, покажува дека „визијата“ што ја има Германија за Македонија станува се' порестриктивна.

На изјавата на германската амбасадорка во Македонија со протест реагираше македонското МНР, кое во неделата ја повика Кноц и и' укажа да се држи во рамките на своите овластувања и да не излегува од својот мандат во земјава. На Кноц и' било кажано да не се меша во внатрешните работи на Македонија, бидејќи нејзините коментари се однесуваат на многу суптилни теми и се дадени на презентација на визии на нерепрезентативен примерок на малолетници. Од Кноц било побарано во иднина да се воздржува од такви контроверзни и штетни изјави.

Споровите со соседите пречка за Македонија

СофиЈа – Бугарија поддржува членство на Македонија во НАТО, што ќе се случи кога „ќе ги реши сите спорови со соседните земји“. Ова вчера го изјави бугарскиот вицепремиер и министер за надворешни работи, Ивајло Калфин, на средба со амбасадорите на земјите-членки на НАТО, како и Албанија и Хрватска, јави агенцијата Бгнес.

„Бугарија во континуитет беше приврзаник на политиката на отворени врати и на присоединувањето на земјите од Западен Балкан кон Алијансата. Нашата земја одигра активна улога во акциониот план за членство во НАТО на Албанија и на Хрватска, а исто така, и на Македонија, кога таа ќе ги разреши сите спорови со соседните земји“, изјави Калфин на средбата во Софија. (Макфакс)

Грција пропуштила шанса со „Славомакедонија“

Атина – Грција пропушти многу шанси во почетокот на деведесеттите години на минатиот век да го реши тешкото прашање за името на Македонија. Ова го рече грчкиот министер за здравство и поранешен градоначалник на Атина, Димитрис Аврамопулос, на конференција на владејачката Нова демократија посветена на грчко-македонскиот спор за името.

Аврамопулос, кој е дипломат од кариера, рече дека Грција во деведесеттите години требало да го прифати името „Славомакедонија“ за државата на нејзината северна граница. „Изгубивме десет години“, рече министерот на собирот насловен „Грција - ФИРОМ: Причини за кризата и позицијата на Грција по Самитот во Букурешт“.

Осврнувајќи се на можен референдум во Грција, Аврамопулос порача дека ниту еден грчки граѓанин нема да го прифати името Македонија како меѓународно признато име на државата. (Макфакс)