Претходен број

Прогноза

На денот на изборите ќе врне снег

Облачно време со повремени врнежи од снег ќе имаме в недела, ден на изборите во Македонија и ден кога настапува пролетта. Метеоролозите најавуваат и мошне студено време со температури кои во текот на денот ќе се движат помеѓу минус 2 и 4 Целзиусови степени. Во утринските часови живата во термометарот ќе се спушти помеѓу минус 7 и минус 2 степена.

Синоптичарите тврдат дека в недела попладне ќе почне да се разведрува. Променливото и облачно време со повремен локален снег ќе настапи уште денеска, а ќе продолжи и утре. Денеска ќе дува и засилен северен ветер. Утринската температура ќе се движи од минус 4 до 3, а дневната од 4 до 12 степени.

Според метеоролозите од Управата за хидрометеоролошки работи, утре брзината на ветрот ќе се намали, а утринската температура ќе биде во опаѓање и ќе се движи од минус 6 до 0. Дневната ќе биде во интервалот од 2 до 8 степени.

„В петок попладне, па се' до крајот на неделата, ќе преовладува променливо облачно и студено време со повремени локални врнежи претежно од снег. Врнежите ќе бидат поинтензивни в петок попладне и в сабота. Температурите ќе бидат во опаѓање, особено за време на викендот. Утринските ќе се движат во интервалот од минус 7 до минус 2, а дневните од минус 2 до 4 степени“, вели Веселин Стојановски, дежурен синоптичар во УХМР.

И во Скопје в недела ќе биде студено со повремени врнежи од снег, особено претпладне, а попладне ќе настапи делумно разведрување. (Сн.К.)