Заев: Владата само потпишува меморандуми, а инвестиции нема
Опозицијата прашува до каде се меморандумите што ги потпишуваше власта и правеше циркус по медиумите
„Груевски потпиша десетици меморандуми за соработка, како ’Монтипе’, ’Сименс‘, ’Искра‘, ’Шишеџам‘, компании од Кореја, Турција, Франција и многу други. Груевски потроши над 8 милиони евра во 2007 година за реклама на ’Инвест Македонија‘, за 2008 се' уште не се знае колку, а инвестиции нема“, обвини вчера в.д. претседателот на СДСМ, Зоран Заев, на вчерашната прес- конференција.
Според Заев, деновиве сме бомбардирани со ветувања на премиерот и министри во Владата на ВМРО-ДПМНЕ за идни инвестиции во Македонија до 2013 година со астрономски цифри, како досега да ги реализираа сите претходни ветени инвестиции.
„Груевски и ВМРО-ДПМНЕ без срам ветуваат нови инвестиции, без претходно да им кажат на граѓаните до каде се сите оние меморандуми што ги потпишуваа и за кои правеа циркус по медиумите. Тој не одговори колку компании инвестираа и влегоа во економската зона ’Бунарџик‘“, истакна Заев, за кого со тоа премиерот покажал дека неговиот потпис на сите тие меморандуми вреди помалку од мастилото што го потрошил да се потпише.
„Ниедна инвестиција што е дојдена во Македонија во последните три години не е реализирана докрај. Оние што започнаа со работа – пропаднаа. Најдобар пример за тоа е ’Сведмилк‘, инвестиција на која Груевски пред девет месеци беше горд и која ја најави како прва гринфилд-инвестиција во Македонија. Сега тој се обидува да ја убеди јавноста дека Владата не може да помогне во случајот со долгот на ’Сведмилк‘ кон фармерите, освен да посредува во решавање на спорот, бидејќи тоа се бизнис-релации на приватни лица“, изјави в.д. претседателот на СДСМ.
Тој праша како на Груевски не му п��ечеше да сними рекламен спот за парламентарните избори 2008 каде што менаџерот на ’Сведмилк‘, Роџер Оскарсон, говори за бизнис-климата и успешната соработка со Владата на ВМРО-ДПМНЕ.
„Зошто тогаш не сакаше Груевски да се држи настрана од приватните субјекти? Или кога треба да зема гласови тоа не му пречи, а кога треба да враќа пари – тогаш се прави наудрен“, објасни Заев.
Додека тече помпезната кампања на Груевски и ВМРО-ДПМНЕ, според опозицијата, девизните резерви се топат, платниот биланс се влошува, а стабилноста на денарот е загрозена. „Жално е што слушаме од медиумите дека во моментов во буџетот има само 5 милиони евра и прашање е дали наредниот месец ќе може да исплатат платите на јавната администрација и пензиите. Во исто време, тие го имаат најрасипничкиот буџет во историјата на Македонија и продолжуваат бесрамно да ги трошат парите на граѓаните на споменици, кампањи, автобуси и возови за партиските потреби на ВМРО- ДПМНЕ“, истакна Заев, кој се надева дека граѓаните ќе ја согледаат вистината за економската состојба во Македонија и овие локални и претседателски избори ќе ги искористат да му доделат жолт картон на Груевски и ВМРО- ДПМНЕ. (А.С.) |
