Владата очекува 62 милиона евра инвестиции во мали хидроцентрали
Договорите за концесии за 65 централи ќе се потпишуваат по изборите
Министерството за економија најави инвестиции од вкупно 62 милиона евра од проектот за мали хидроцентрали. Како што беше истакнато на вчерашниот прес во Министерството, предвидено е да се изградат околу 400 мали хидроцентрали со одделна моќност до 5 мегавати, односно нивната вкупна моќност ќе биде 250 мегавати.
Според министерот за економија, Фатмир Бесими, очекуваното годишно производство на електрична енергија од овие централи се очекува да изнесува околу 1.200 гигават-часа, додека вкупната инвестиција се проценува на околу 300 милиони евра. Бесими потсети дека во периодот 2006-2008 година беа објавени три меѓународни огласи за давање концесија за вода за производство на струја од мали хидроцентрали.
Притоа, на првиот оглас биле доделени 41 локација, со вкупна инсталирана моќност од 43,7 мегавати, при што вкупната произведена струја треба да изнесува околу 189 ггвч. годишно. Инвестиционата вредност се очекува да биде околу 45 милиони евра.
На вториот оглас биле доделени 24 локации со вкупна инсталирана моќност од 15,4 мегавати, а вкупната струја треба да изнесува 65 ггвч. годишно. Инвестиционата вредност ќе биде 17 милиони евра. Тоа би значело дека по успешното завршување на првите две фази од проектот, вкупните инвестиции би изнесувале 62 милиона евра.
Договорите за концесија за вода за првиот и за вториот оглас се подготвени за потпишување, но ќе бидат парафирани по официјалното завршување на изборите, за што компаниите се веќе известени, информира Бесими.
Третиот оглас, пак, беше објавен на 16 декември 2008 година, а траеше до 16 јануари годинава. Тој е за 20 локации со вкупен капацитет од 13,4 мегавати, со очекувано годишно производ��тво од 54 ггвч. Проценетата инвестиција е околу 15 милиони евра. Тендерската документација досега ја подигнале 30 домашни и странски компании, а рокот за доставување понуди е 16 април 2009 година.
Во Министерството за економија во тек се подготовките за објавување четврти јавен оглас за околу 20-30 мали централи на сливот на реките Вардар, Брегалница, Струмица и Црн Дрим. Огласот ќе биде објавен по завршувањето на изборниот процес. (М.Т.) |
