ФОКУС
Oд несуден економист до врвен пекар
Газдата на „Вегера“, Јован Јанакиевски, тајната на успехот ја лоцира во мајсторството
Соња Маџовска
Несудениот економист Јован Јанакиевски, газда на „Вегера“, целосно и' се посвети на пекарската индустрија. Фактот што по дипломирањето се видел на 260. место на листата на чекање во Заводот за вработување бил доволна провокација да ризикува и да почне со свој бизнис. Пред 15 години ја отворил првата бурекчилница во општина Центар, кај училиштето „Песталоци“. Вели дека тогаш сам почнал да го пробива мразот во пекарскиот бизнис. Ако тогаш „Жито лукс“ го доживувал како „Сименс“ во пекарската индустрија, денеска и за „Вегера“ може да се каже дека прераснува во бренд препознатлив речиси за секој скопјанец. Својата кариера најсликовито ја објаснува преку серијата актуелна во доцните деведесетти години „Аирлија транзиција“.
„Не сум од пекарско семејство во кое дедовците и татковците биле пекари. Напротив, тие беа интелектуалци. Но, сепак, го направив изборот за пекарство. Во почеток, за оваа дејност не ви се потребни биро, телефон и автомобил, туку бара значајно инвестирање. Не можам да кажам дека сум имал свои пари. Сум се задолжил и така сум почнал. Се сеќавам на онаа серија што тогаш ја снимаше Горан Стефановски, која се викаше ’Аирлија транзиција‘. Тоа беа фактички почетоците на транзицијата. Ние бевме дел од таа емисија“, вака ја почнува својата бизнис-приказна сопственикот на „Вегера“, Јанакиевски.
Стартувал само со шест луѓе, а за 15 години бројот на вработени се искачил на 135 луѓе. Моментно компанијата наголемо се подготвува за преселба во новите простории во Капиштец откако минатата есен сопственикот на „Вегера“ ја купи дирекцијата на „Жито лукс“.
„Горд сум на тоа како сум почнал, како сме работеле и какви позиции имаме моментално. Почнавме во објектот кај училиштето ’Песталоци‘, а сега го напуштаме. Се' уште го држиме како нешто автентично, од каде што сме почнале, иако веќе е очигледно дека ќе мора да го затвориме. На крајот на мај се селиме во новите простории во Капиштец. Целото производство ќе го преселиме таму. Тој објект некогаш е правен според сите стандарди. Меѓутоа, мора да се приспособи на новите трендови“, вели Јанакиевски.
„Вегера“ засега е присутна со 12 продавници само во Скопје. Според Јанакиевски, тајната на успехот е во мајсторството. Производите со кои почнал значеле нешто ново и интересно на пазарот, со што го привлекле вниманието. Тоа, пак, на Јанакиевски му отворило други хоризонти, за кои во почетокот не се осмелувал ниту да размислува. Денеска планира ширење на бизнисот надвор од Скопје, а прва дестинација најверојатно е Охрид. „Од почетокот градиме стратегија на привлекување мајстори кои се дојдени од различни делови на поранешна Југославија. Денеска имаме сопствена школа за мајстори. Кога почнувате да се занимавате со оваа работа, вие сте бебе што ги добива сите болести. Треба да ги поминете, а тоа значи градење искуство, знаење, понекогаш промашувања, погрешни чекори“, објаснува Јанакиевски.
Поголемиот дел од бизнисот со години главно бил носење храна во речиси 70 отсто од скопските училишта. Сега во центарот на вниманието им е отворање продавници на атрактивни локации, како онаа на стара „Ванила“ во Градскиот трговски центар. Златна кокошка засега е продавницата спроти „Багат“ во центарот на градот. „Несомнено е така. Парите од таа инвестиција веќе се вратени. Но, тоа не е наш дуќан, за него плаќаме кирија. Додека, пак, стара ’Ванила‘ е наш сопствен дуќан. Инаку, објектот во Капиштец не го купивме евтино и се' уште го отплаќаме. А згора на тоа, токму во тој период не снајде и економската криза,“, вели Јанакиевски.
Најголем проблем, според него, од кризата е што банките се многу затворени, отежнат е пристапот до свеж капитал со кој би влегле во нови инвестиции. Сепак, Јанакиевски објаснува дека колку и граѓаните да се трудат да штедат, за храна секогаш мора да се најдат пари. Тој вели: „Пекарските фирми и во војна работат добро“.
Сепак, сопственикот на „Вегера“ смета дека моментно централната банка форсира рестриктивна политика, поради што банките се многу селективни. „Не е логично ако светот оди на намалување на каматите за да ја заживее економијата, кај нас да се зголемуваате. Парите стануваат скапи. Се' уште водиме разговори за одобрување кредит“, потенцира Јанакиевски, кој за себе вели дека не е политички определен и дека влетувањето во политика во суштина би му штетело на бизнисот.
Конкуренцијата на домашниот пазар Јанакиевски ја гледа како движечка сила што ги мотивира пекарските фирми да бидат се' подобри. Тој смета дека е неизбежно да се следат светските трендови и да се применуваат постојано новите стандарди, како што е воведувањето на ХАСАП-стандардот. Јанакиевски потенцира дека тајната на успехот лежи во градењето доверба со клиентите и со нудење постојано нови, топли и квалитетни производи. |
