5 прашања 5 одговори

Не сум колатерална штета

Силвана Бонева

Нормално е премиерот да остави пратеничката група да ја донесе одлуката,

Оливера Војновска

Госпоѓо Бонева, зошто премиерот Никола Груевски Ви го испрати писмото од Филе? Дали разговаравте со него за тоа?

Собраниската седница беше во тек и мислам дека писмото беше пратено за да разговарам уште еднаш со пратениците за ставот на Европската комисија околу Законот за антидискриминација. Се јавив двапати, но премиерот имаше некои средби и не успеав да се слушнав. Сметав дека штом премиерот ми испраќа лично писмо, сака да го имам на знаење. Проценив дека треба да им го дадам на членовите на Извршниот комитет што беа во Собранието, другите пратеници ги информирав дека има писмо од Филе и дека се бара експлицитно да биде наведена сексуалната ориентација. Направивме кратка координација, ставот на сите пратеници беше дека овој Закон не ги исклучува од заштита луѓето со различна сексуална ориентација. Беше оставено секој да си гласа според сопственото убедување. Значи, мојата обврска како координатор беше да ги запознаам сите мои колеги од пратеничката група со писмото и јас го направив тоа.



Зошто за дописот од еврокомесарот не ги информиравте и пратениците од другите пратенички групи ?

Писмото не гласеше до координаторите на пратеничките групи, туку до премиерот. Ако писмото беше назначено до претседателот на Собранието, до координаторите на пратеничките групи, јас ќе сфатев дека треба да го препратам и до другите. Ама нема логика јас да бидам технички курир во Собранието. Тоа не е моја обврска. Се знае каков е редот. Ако ЕУ сакала да испрати писмо до парламентот, тоа ќе стасало во Архивата на Собранието и ќе им се проследеше на сите пратеници. Јас не сум приемно одделение на Собранието, па да ги кријам писмата и да не и' ги давам на Архивата да ги заведува. Тоа е целата приказна. Никој ништо не крие. Јас немам зошто да го правам тоа.



Владата седум дена молчеше откако Филе го обелодени писмото, за потоа премиерот да ја префрли целата одговорност кај Бонева?

Не е така. Тоа е лошо интерпретирано. Бонева е една од еднаквите во Собранието, со обврска да ги координира пратениците, но не може да го промени нивниот став. Јас како координатор можам да направам толку - да ги информирам нашите пратеници дека покрај пораките што беа испратени преку јавноста, имаме и писмо од Брисел дека треба да се направи корекција во тој дел на Законот. Тоа беше обврска на Силвана Бонева, пренесена од премиерот, бидејќи Законот веќе не е во владина п��оцедура.

Ако еден закон излезе од владина процедура, ако пратениците дискутираат, ако се знае дека законот предизвика вистинска бура и во јавноста, но и внатре во нашата пратеничка група, тогаш јасно е дека премиерот, како и многупати досега, ќе остави пратеничката група да ја донесе одлуката или пратениците да гласаат по сопствена совест. Се направија максимални напори законот да биде усогласен со невладините организации и се успеа во тоа. Но, кај поголем дел од пратениците немаше расположение експлицитно да биде вметната сексуалната ориентација. Јас сум убедена дека ние имаме европски закон.



Зошто се тогаш реакциите од Брисел?

Мислам дека реакциите не се резултат на Законот. Најверојатно, одгласот што доаѓа од Брисел е резултат на неколку несреќни изјави и на општата атмосфера што се создаде по влегувањето на првата верзија во собраниска процедура. Овој текст немаше дефинирани видови дискриминација и не постоеше независно тело. Во финалниот текст беа коригирани речиси 80 проценти од одредбите и се направи еден квалитетен Закон за кој сите пратеници од ВМРО-ДПМНЕ сметаат дека ги задоволува европските стандарди.



Излезе ли Бонева на крајот од приказната како колатерална штета?

Не се чувствувам како колатерална штета. Координаторот секогаш ја носи одговорноста за се' што се случува во пратеничката група. Но, треба да се разбере дека координаторот на која било пратеничка група, па и на ВМРО-ДПМНЕ, не може да им го промени ставот на пратениците. Јас само замолив дел од колегите да не ги искажуваат јавно екстремните ставови за да не му направат повеќе штета на целиот процес. Сепак, одлуката ја носат самите пратеници.