Поскапуваат горивата, алкохолот и цигарите во Грција

Атина - Цените на горивата, алкохолот и на цигарите во Грција почнаа да се зголемуваат како резултат на зголемувањето на акцизите и најавениот раст на ДДВ. Во согласност со одлуката на грчката влада, од вчера се зголемени акцизите на горивата, алкохолот и на цигарите, а од 1 јули ќе биде зголемен и ДДВ од сегашните стапки од 21 на 23 отсто, од десет на 11 отсто и од пет на 5,5 проценти. Со овие мерки владата очекува да обезбеди дополнителен приход од 1,46 милијарди евра.

Бензините во Грција поскапеа за осум евроценти и нивната просечна цена сега изнесува 1,54 евра за литар. Во исто време, цигарите поскапеа од просечната цена на 3,8 евра на 4,8, поради зголемување на акцизата на десет проценти. Цените на алкохолните пијалаци, пак, се зголемени за над две евра, поради растот на акцизите на 30 проценти.

Со новите мерки за 200 проценти е зголемен и данокот на луксуз на скапите автомобили и џиповите.

Грчките пензионери, пак, во зависност од висината на нивните пензии во текот на годинава ќе изгубат меѓу 200 и 8.000 евра. Ова следува по одлуката на владата досегашните 13. и 14. пензија да ги замени со додатоци во вкупна вредност од 800 евра и тоа по 200 евра како регреси за Велигден и за летување и 400 евра за Божик. Најголемо намалување на пензиите ќе имаат пензионерите што месечно примаат над 2.500 евра. Дополнително, од 1 август ќе биде воведен и данок за пензиите поголеми од 1.400 евра. Со ваквите рестрикции намалување на пензиите ќе има кај 1,5 милиони грчки пензионери од вкупно 2,3 милиони. (МИА)