Владата негира дека ќе има млечна криза

Битола - Ниту имало ниту ќе има млечна криза во државата оваа година. Ниту, пак, поплавите направија голема штета врз есенската и пролетната сеидба во најголемата житница во државата - Пелагонија. Ова го тврди заменик-министерот за земјоделство, Перица Ивановски, по обиколката на пелагонискиот регион.

Според видувањата на владиниот претставник, медиумите се тие што настапувајќи кампањски, наметнале проблем дека веќе има или дека на повидок е млечна криза. Меѓутоа, за вториот човек на Министерството за земјоделство, состојбите во млекопроизводството се сосема нормални и вообичаени, иако и фармерите, но и млекарниците, особено ИМБ, со денови го тврдат спротивното.

„Одговорно тврдам дека моментално ниту има ниту предвидуваме дека во следниот период може да има млечна криза од аспект на вишоци или недостиг од млеко на пазарот. Понудата на сурово млеко во однос на побарувачката е стабилна“, рече Ивановски во Битола. (А.Б.)