Електричните автомобили опасни за пешаците

Лондон - Британскиот весник „Индепендент“ објави дека пешаците на улици во британските градови се во опасност, поради се' поголем број еколошки чисти, односно електрични автомобили. Веројатно, тие автомобили се иднина на личниот превоз во големите градови и главна предност им е што се мали, еколошки и бесшумни. Но, тој „звук на тишината“, според најновите истражувања, е голема опасност за пешаците што често не слушаат и се несвесни дека им се приближува автомобил. Производителите во иднина може да добијат налог од законодавците во тие автомобили да вградуваат вештачки звук. Но, не е исклучено, да се реши возилото место звук на мотор да испушта музика. Британската фабрика „Лиф“, најави дека своите возила од март идната година ќе ги испорачува со вграден звук од филмот „Војна на ѕвездите“. (МИА)