Претходен број

Владата пак ќе се задолжува, ратите стасуваат

Груевски вчера изјави дека нема буџетска криза и дека ќе има пари за плати на администрацијата

Соња Маџовска

За денеска е закажана нова аукција на едномесечни државни записи со камата од 8,25 отсто, преку која Владата сака да собере дополнителни 45 милиони евра од банките и граѓаните.

Секоја недела веќе се одржуваат аукции на државни записи, со кои Владата, за да ја покрие дупката во буџетот, се задолжува по многу висока цена. Прв пат пред две недели се издадоа и едномесечни записи со фиксна камата од 8,9 отсто, кои банките и граѓаните сите ги откупија, со што во буџетот се инкасираа 32 милиона евра.

Во меѓувреме, минатата недела се одржа и аукција на три месечни записи, по уште повисока камата од 9,25 отсто, но иако Владата бараше 40 милиони евра, успеа да прибере само 15 милиони евра.

Експертите предупредуваат дека Владата плаќа превисока цена за да го наполни буџетот.

Премиерот Никола Груевски, пак, вчера изјави дека нема буџетска криза и дека ќе има пари за плати.

„Состојбата што се прикажуваше во последните денови во медиумите, дека буџетот е во криза и нема доволно средства, е неточна. Записите што ги издава Министерството за финансии почнаа уште во времето на поранешниот министер Никола Поповски и станаа редовна практика. Тоа беше по препорака на ММФ. Тие препорачуваа дека е здраво за еден буџет и за една економија да има такви записи со кои ќе покриваат повремени ситуации. Воопшто немаме сериозен проблем со буџетскиот дефицит. Државни записи имало и ќе има. Во никој случај нема да се случи да нема пари за плати за вработените во администрацијата, тоа беше шпекулација пуштена во предизборието“, изјави Груевски.

Експертите предупредија дека Владата со издавањето записи, од една страна, плаќа превисока цена за да ја покрие дупката во буџетот, а од друга страна, ги истиснува парите од банките, поради што страда стопанството, и сето ова во услови на криза кога и онака тешко се доаѓа до капитал.

Економските аналитичари ја поставуваат и дилемата дали ова е вистинскиот начин да се покрие буџетскиот дефицит кога нема знаци дека даночн��те приливи ќе се зголемуваат, а веќе за 15 дена стасуваат за наплата едномесечните записи од првата аукција, вредни 32 милиона евра. Тие предупредија и на опасноста од создавање пирамида ако Владата мора повторно да се задолжува за да ги врати овие пари.

И од Министерството за финансии неодамна потврдија дека буџетските трошоци се далеку поголеми отколку приходите. Во првите два месеца во државната каса има помалку даночни приходи за 6,5 милиони евра во однос на планираното.

Околу 4 милиони евра од државната каса се предвидени за финансирање на претседателските и локалните избори. Овие средства се испланирани уште при носењето на буџетот за годинава. Сепак, за трошењето на средствата за изборите е задолжена Државната изборна комисија, а Министерството за финансии само ги одобрува. И за минатите парламентарни избори, исто така, биле потрошени околу 4 милиони евра. Ова за „Утрински весник“ го потврди министерот за финансии, Трајко Славески, кој негираше дека обезбедувањето средства за спроведување на изборите има некаква врска со последните итни задолжувања што ги прави Владата на домашниот пазар преку се' почестите аукции на државни записи.

Но, покрај за спроведување на изборите, во овој период многу пари почнаа да се трошат и за реализација на капитални проекти, со кои во предизборието власта сака да им покаже на граѓаните дека работите се движат. За време на предизборната кампања се поставуваа камен-темелници за изградба на нови патишта, водоводи, училишта. Во овој период очигледно е дека и министерствата се покажале како многу ажурни во реализацијата на расходите, односно ги започнале капиталните проекти, иако тоа со години наназад не беше практика. Овие пари предвидени со буџетите за капитални расходи досега најчесто не се искористуваа целосно и на крајот од годината се пренаменуваа за други споредни проекти.