НИС продаден на руски „Гаспром“ за 400 млн. евра

Владата на Србија и руски „Гаспром“ вчера потпишаа договор за продажба на Нафтената индустрија на Србија (НИС) на оваа компанија, за 400 милиони евра. Како што јавуваат српски медиуми, со договорот се опфатени и документите за изградба на гасоводот „Јужен поток“, како и на складиште за гас во Банатски Двор.

Претседателите на Србија и на Русија, Борис Тадиќ и Дмитриј Медведев, потпишале заедничка изјава, што ќе биде политичка гаранција дека Србија ќе добие дел од гасоводот „Јужен поток“ и дека ќе биде завршено подземното складиште на гас во Банатски Двор.

Тадиќ и Медведев, пред потпишувањето на договорот за енергетска соработка, оцениле дека аранжманот е основа за енергетската стабилност на двете земји. „Енергетската соработка на двете земји во исто време е основа за создавање енергетска стабилност на Србија, но и на целиот регион“, рече Медведев. Шефот на руската држава оценил дека односите меѓу Белград и Москва добро се развиваат и изразил надеж дека економската соработка во иднина ќе биде поинтензивна. (Според агенциите)