Хипо прва во Австрија ќе добие државна помош

Виена - Само неколку часа пред почетокот на божикните празници, австриските власти дадоа зелено светло за првото доделување државна помош за банка во земјата од почетокот на светската финансиска криза. Станува збор за банката Хипо Алпе Адрија, која ќе добие 900 милиони евра. Всушност, прва банка која соопшти дека ќе побара пари од државата беше Ерсте банк, но очигледно Хипо Алпе Адрија прва ја спроведе потребната процедура и добива државни средства уште на Божик. На крајот од годината тоа ќе и' ја зголеми квотата на основниот капитал на 8,4 проценти.

Секој момент државата ќе може да го преврти својот капитал во Хипо Алпе Адрија во основни акции и на тој начин да придобие директно учество. За сметка на тоа, банката ќе има право да го менува капиталот дури по пет години. (МИА)