За фармерите по наместо 2,5 денари 4 за литар млеко

По четири денари за литар предадено млеко наместо по 2,5 денари ќе добијат фармерите до крајот на неделава, соопшти вчера министерот за земјоделство Ацо Спасеноски. Тој изјави дека не станува збор за нови, дополнителни средства, туку за пренамена на веќе дефинираните субвенции. „Ова не се нови средства. Направивме само прераспределба на поддршката од Програмата за поттикнување на развој на земјоделството. Сега, за предаденото млеко, наместо првично проектираните 285 милиони денари, ќе се реализираат 447 милиони“, рече Спасеноски. Министерот вчера соопшти и дека ресорот за земјоделство ќе продолжи со огласување и распределба на државното земјоделско земјиште. Можност за американски инвестиции во македонското земјоделство најави вчера амбасадорот на САД во Македонија, Филип Рикер, на средба со Спасеноски. Пред евентуалните вложувања, напомена Рикер, ќе биде неопходно да се направат процени на терен, но и анализи за последиците од глобалната криза. (МИА)