СДСМ се разбуди - ќе окупира улици

Се однесувавме крајно конструктивно, но власта целосно не' игнорираше, рече вчера Бранко Црвенковски. Опозицијата ја менува стратегијата и ќе почне да практикува улична демократија, како увертира во кампањата за локалните избори

Александра М. Митевска


СДСМ ја менува стратегијата во битката против Владата на ВМРО-ДПМНЕ. По низа критики дека е пасивна, опозицијата реши отсега да практикува улична демократија, како увертира во кампањата за локалните избори.

Лидерот на социјалдемократите, Бранко Црвенковски, објави вчера дека водењето на политичката битка преку институциите не ги дало очекуваните резултати. Поради тоа опозицијата ќе го засили притисокот врз владејачката гарнитура, излегувајќи на протести и митинзи на плоштадите низ целата држава. Социјалдемократите планираат да протестираат речиси секој викенд, во текот на целото лето.

„Во изминатиот период, СДСМ се однесуваше крајно конструктивно, водејќи пред се' сметка за националните и државни интереси. Благовремено и јавно предупредувавме на сите погрешни владини политики. Власта целосно не' игнорираше, а последиците од тој арогантен однос ги чувствуваме денес“, рече Црвенковски.

Тој изјави дека овие протести немаат никаква врска со петочните протести против акцијата „Монструм“. „Нашите протести ќе бидат демократски, граѓански и мирни“, вети Црвенковски.

Од СДСМ демантираат и дека митинзите и протести што ги најавија вчера имаат врска со медиумските шпекулации за голем опозициски протест веднаш по самитот на НАТО во Чикаго. Функционер на СДСМ вели дека престојните митинзи низ повеќе градови се „сосема различна офанзива“ и дека тие ќе бидат искористени и за промоција на кандидатите за градоначалници на СДСМ за изборите во 2013 година.

Опозицијата планира порано од вообичаеното да ги објави имињата на своите кандидати за локалните избори. Централниот одбор на СДСМ заседаваше синоќа, за, како што дознаваме, да ги утврди правилата за утврдување на партиските кандидатури за градоначалници за изборите што ќе се одржат по 10 месеци.

Црвенковски наведе повеќе причини за протестите, што ќе почнат на 3 јуни во Струмица, а ќе финишираат на 2 септември со „голем општонароден“ митинг во Скопје, што опозицијата ќе го искористи да направи биланс на севкупното владеење на ВМРО-ДПМНЕ, бидејќи на 26 август ќе се заокружат шест години од доаѓањето на Никола Груевски на власт. Невработеност и сиромаштијата, рече Црвенковски, постојано се зголемуваат, а стандардот на граѓаните се' повеќе се намалува. Стопанството, според Црвенковски, се гуши во неликвидност, а вкупната задолженост на земјата радикално се зголемува. За меѓуетничките односи рече дека се нарушени, а за евроатлантските интеграции дека се целосно блокирани...

„СДСМ е најголема опозициска партија и наша должност е да се спротивставиме на ваквото неодговорно однесување, да ги удвоиме напорите, да го артикулираме растечкото незадоволство на граѓаните“, рече Црвенковски. Тој изјави дека останува отворена можноста за ширење на коалицијата на СДСМ со сите опозициски настроени субјекти, без разлика на идеолошка и етничка определба. Не ја исклучи ниту можноста повторно да бара предвремени парламентарни избори, но и во оваа пригода кажа дека тоа би се случило по локалните избори доколку исходот од нив навести дека постои расположение за смена на власта на централно ниво.