Нов бран во дипломатијата

Петар Поп Арсов, инженер-технолог, ќе биде наш претставник во мисијата во Советот на Европа

Слободанка Јовановска

Уште еден партиски член на ВМРО-ДПМНЕ ја помина процедурата и заминува на функцијата амбасадор на Македонија во Советот на Европа во Стразбур. Изборот е Петар Поп Арсов, пратеник во претходниот состав на Парламентот, дипломиран инженер-технолог, според официјалната биографија специјализиран за „базно органско и полимерно инженерство“.

Арсов во Стразбур ќе зборува англиски, бидејќи не го владее францускиот јазик, а најголемо искуство што има допирна точка со дипломатијата и Советот на Европа му е водењето на Комисијата за европски прашања, членството во Националниот совет за евроинтеграции и шефувањето со делегацијата на Македонија во ЦЕИ.

„Не можам да бидам ни целосно негативен, ни позитивен за ова именување. Со неговата работа ќе покаже дали го заслужува“, изјави Игор Ивановски од СДСМ при презентацијата на тезите од страна на Арсов пред Комисијата за надворешна политика, нарекувајќи го овој тренд „портокалов бран во дипломатијата“. „МНР е на добар пат да стане маргинално и е на пат до распад“, искоментира тој генерално, посочувајќи ги како причини за тоа партизацијата, превработеноста, префрлањето на вишокот кадри во другите министерства, па и во тоа за земјоделство, така што дипломатите сега работат на граница на издржливоста.

Додека Арсов се фокусираше на делот за човековите права на нашите малцинства во соседството и добриот пример што го дава Македонија во оваа сфера, опозицијата го прашуваше што ќе прави околу критиките против нашата земја, за слободата на медиумите, за игнорирањето од страна на нашите судови на одлуките на Советот на Европа кои поставуваат стандарди за клеветата, за скандалот околу одбивањето на нашите кандидати за членови во тамошната комисија за тортура бидејќи биле партиски и неквалификувани, како и најгласното - зошто не отиде за генерален конзул во Мелбурн, одлука што пројде и низ владина процедура, туку заврши во мисијата во Стразбур? Ниту на едно од овие прашања Поп Арсов не одговори директно, но се заблагодари и за пофалбите и за критиките кон него, бидејќи тоа било демократија.

Притоа тој наведе дека во Судот за човекови права моментално има 9 судски апликации против Бугарија од македонските организации, при што за осум од нив е утврдена повреда на правата, а три случаи на таква повреда се утврдени и за Грција. Мариела Тушева од СДСМ го праша како ќе ја врши функцијата со еден дипломат во мисијата и кога веќе сега стигаат критики од Комитетот на министрите дека наши претставници многу често нема на состаноците на ова тело. Таа праша исто така зошто МНР не презело мерки против претходниот амбасадор кој според неа „за лични цели ја продал Македонија“, па ние го изгубивме името и придавката во Стразбур а тој доби функција од Советот на Европа во Украина. Таа го потсети Арсов дека има 374 нови апликации од македонски граѓани во Судот за човекови права кои се против државата, покрај веќе постоечките над илјада, за кои тој ќе треба да има одговори. „Најважен е судот на совеста, немам никакви материјални побарувања“, и' реплицираше екс министерот Антонио Милошоски на Тушева, бидејќи се најде повикан да одговори за случајот со новинарката Јадранка Костова, која беше осудена за клевета иако доставила пет пресуди за исти дела од Судот за човекови права со спротивни одлуки.

Арсов беше потсетен дека Македонија се уште е држава под мониторинг на Стразбур и дека повторно турка изборен закон без консензус и без мислење на Венецијанската комисија на Советот на Европа, нешта за кои тој треба да има став во интерес на граѓаните а не на владејачката гарнитура. За Милошоски Арсов е добар избор, бидејќи имал битни функции во Собр��нието, каде што покажал голема посветеност, професионалност и упорност, а Силвана Бонева му порача да ја брани придавката македонски, што некои претходно дозволиле да биде ставена под прашалник во Стразбур.