Поглед

Склекови за пред камери

Даниела Трпчевска

Уште колку склекови ќе треба да направат идните полицајци пред камерите пред да станат дел од елитните единици во МВР. Конкурсот за прием на 300 нови полицајци во МВР од интерна, деновиве, стана јавна и најбитна работа за која известуваат медиумите. Склековите на новите кандидати, покажувањето на мускулите, трчањето низ препреки и подигнувањето на вратило не само што се главна занимација секој викенд, туку елиминацијата на кандидатите редовно се одвива под будното око на министерката Гордана Јанкулоска.

Така, конкурсот за прием на нови кадри, кој е интерна работа на министерството, освен кога има прекршување на процедурите и прием на кадри по партиска линија, сега се чини е издигнат до ниво на врвен приоритет. Јавноста имаше прилика досега да дознае дека за 300 места се пријавиле 7.500 кандидати. Откако во неколку круга беа тестирани пред полицискиот врв, од нив 700 го имаат поминато тестирањето. До 19 овој месец, уште стотина ќе треба да ги покажат своите физички способности, пред да се покажат пред комисијата, како им оди пишувањето на есеи и решавањето на психолошките тестови и проверката на интелигенцијата.

Во обидот за транспарентност и елиминирање на можностите да бидат критикувани дека вработуваат несосодветни и партиски кадри, МВР овој пат се сопна на првата препрека - направи парада и политички маркетинг од конкурс што требаше да заврши тивко, мирно и без многу помпа. Очигледно е дека полицијата, меѓу другото, со новите кадри планира да ги поднови специјалните единици, што е уште една причина повеќе предвреме да не се експонираат во јавноста.

Со тоа го прекршуваат правото на приватност на секој кандидат да конкурира за определено работно место, а за кое се' уште не се знае ниту дали ќе го добие. На крај се наметнува и прашањето што ако конкурсот не успее, што ако склековите на кандидатите останат само за пред камери?