Уште еден обид на Нимиц да ги доближи Скопје и Атина

Посредникот на ОН, според најавите, следната седмица ќе дојде во Скопје заедно со генералниот секретар Бан Ки-мун

Слободанка Јовановска

Посредникот во спорот за името со Грција, Метју Нимиц ќе дојде со генералниот секретар на ОН, Бан Ки-мун идната среда во Скопје. Иако од неговата канцеларија во Њујорк известија дека тој се пензионирал и заминал од тамошната позиција, Нимиц и натаму не се откажува од медијаторството околу спорот за името меѓу Грција и Македонија, што го врши над една деценија.

Дека Нимиц ќе го придружува генералниот секретар во Скопје потврди самиот Бан Ки-мун пред новинарите во Њујорк, одговарајќи на прашањето дали се плаши што проблемот меѓу Македонија и Грција се уште не е решен.

„Мојот специјален пратеник за ова прашање ќе биде со мене во Скопје, па ќе имаме можност за тоа да дискутираме со претседателот Иванов и со премиерот Груевски. За жал, тој проблем за името трае многу долго. Јас веќе одамна од лидерите на Грција и на БЈРМ барам ова прашање да го решат што е можно поскоро за нивно заедничко добро, поради што е важно да покажат флексибилност и чувство за компромис“, изјавил Бан Ки-мун.

Асистентката на Нимиц, вчера на нашето телефонско барање да добиеме потврда за неговото доаѓање, кусо ни' рече дека тој се пензионирал и повеќе не доаѓа во неговата доскорешна канцеларија во Њујорк. Нимиц има 73 години.

Оваа најголема балканска турнеја генералниот секретар на ОН Бан Ки-мун ја започна вчера, но со стартна посета на Кина, каде што ќе учествува на министерска конференција на Форумот за соработка Кина и Африка. Во текот на наредните десет дена тој ќе допатува во регионот со цел да промовира силно партнерство меѓу Обединетите нации и земјите тука. Негова прва станица ќе биде Словенија, а потоа ќе престојува во Хрватска, во Црна Гора, во Србија, Косово па во Македонија. Според најавите од ОН, Ки Мун ќе се сретне со претседателот Ѓорге Иванов и со премиерот Никола Груевски и ќе се обрати пред Парламентот , по средбата со спикерот Трајко Вељаноски. Последна станица на генералниот секретар ќе биде Босна и Херцеговина, а на агендата очигледно се само земји од бивша Југославија, без Албанија и Грција.