Штрајк на таксистите во Лондон

Таксистите го блокираа сообраќајот поради забраната за користење на т.н. олимписки патеки

Околу 200 таксисти го блокираа сообраќајот пред парламентот во Лондон во знак на протест што добија забрана за користење на т.н. олимписки патеки за време на Олимписките игри. Посебни улични патеки низ целиот град во должина од 45 километри од среда ќе бидат резервирани исклучително за возила што ќе превезуваат учесници во Игрите, службеници и спонзори. По нив нема да можат да се движат такси-возилата и сите останати автомобили, а казната за нивно користење е 130 фунти.

Затоа Вестминстер беше под сообраќајна блокада од околу 200 препознатливи лондонски црни такси-возила што беа паркирани околу плоштадот со вклучени сирени, а полицијата немоќно ја следеше целата ситуација.

„Олимписките патеки се жални, ќе ни наштетат и на нас и на другите возачи. Нашите приходи ќе паднат за 40 отсто за време на Олимписките игри бидејќи на луѓето им се препорачува користење на јавниот превоз. Не се почитува тешката работа на возачите на црните такси-возила што треба да бидат дел од олимпијадата“, вели еден од незадоволните.