18.07.2012, 10:19 Вардар без бело знаме во Борисов
„Црвено-црните“ попладнево (18 ч.) гости на белорускиот тим БАТЕ во првиот меч од второто коло во квалификациите за ЛШ
Сашко Ѓ. Димовски
Вардар се враќа на европската фудбалска сцена по пауза од пет години. Последен пат беше дел од неа во сезоната 2007/08 и дуелите со кипарски Анортозис во Лига Европа (0:1, 0:1) и оттогаш не одиграа ниту еден официјален меѓународен меч од натпреварувачки карактер. Се' до попладнево (18 ч.) и гостувањето кај белорускиот првак БАТЕ Борисов во првиот меч од второто квалификациско коло за Лигата на шампиони.
Ривалот е фаворит, но „црвено-црните“ отпатуваа во Белорусија со порака дека немаат намера да развиорат бело знаме. Го добија задоволството да ја претставуваат својата држава во најелитното континентално клупско натпреварување, ќе играат за своја чест и враќање на сопствениот углед и притоа ќе имаат обврска да се обидат да ја одмаздат Македонија Ѓорче Петров, која во сезоната 2009/10 беше елиминирана од истиот противник, во истата фаза, во истото ова натпреварување. И ќе сторат се' што е во нивните можности да успеат во мисијата. Дека нема да биде лесно се свесни и самите, меѓутоа пријатно изненадува оптимизам што го понесоа со себе во Белорусија. Нагласија дека размислуваат на победа како што било случај досега и како што ќе биде и во иднина. Тренерот Илчо Ѓорѓиоски, кој патем ги водеше и ѓорчепетровци против Белорусите пред три години, не може да смета единствено на дефанзивецот Раденко Бојовиќ. Но, според него, тоа не е пречка за добро издание на вардарци на стадионот „Годоскои“ во Борисов.
„Бојовиќ нема да игра попладнево и на тоа не треба да се гледа дека Вардар не може без него. Ќе биде тешко, ќе недостасува, но неговото отсуство мора да се надомести. Фокусирани сме на нас, на нашата игра и амбиции. Затоа ќе сториме се' што може за да обезбедиме што поповолен резултат за реваншот во Скопје“, истакна Ѓорѓиоски пред заминување за Белорусија.
И додека Вардар се остри да го замолкне фаворизираниот ривал и неговите фанови на трибините, Белорусите порачуваат дека македонскиот шампион е „прочитан“ и нема со што да изненади попладнево.
„Имаме доволно сознанија за Вардар, за неговата игра, за играчкиот кадар. Ништо не може да не' изненади“, самоуверено нагласи тренерот на БАТЕ Борисов, Виктор Гончаренко, чиј тим е во непријатна резултатска серија за која, како што вели, домашното првенство е едно, а Европа е сосема нешто друго.
„Резултатите што ги бележиме во последниот период се неочекувани, лоши. Меѓутоа дуелите со Вардар се европски, а мојата екипа има доволно страст, концентрација и мотиви да одговори на потребниот начин и да го постигне посакуванио�� ефект во вакви натпреварувања. Желбата за победа е огромна, амбициите за пласман во групната фаза исто така“, дополни шефот во соблекувалната на БАТЕ Борисов, кој за денешните 90 минути со Вардар остана без услугите на Дмитри Бага и Ренан Брешан, играчи за врска, кои се сметаат за основа во фудбалската концепција и филозофија на шампионот на Белорусија.
|
