Реплики

Црвенковски и Георгиевски

Соња Крамарска

Пактот со Георгиевски може да биде меч со две острици за СДСМ на чие гласачко тело нема да им се допадне цврстото држење на Љупчо за Тодор Александров

Секој оној што ја следи политичката сцена во Македонија од осамостојувањето до денес, не може а да не се согласи дека Љупчо Георгиевски е еден од најхаризматичните политичари во Македонија кому никогаш не му недостасувала храброст (некои тоа го викаат лудост) да го каже или стори тоа што го мисли, па макар подоцна да плати и највисока цена за својата изјава.

Така беше и кога во 1999 го повика Хашим Тачи во премиерска посета, од што социјалдемократите се соблазнуваа и со недели ги брифираа новинарите колку е тоа штетен политички потег за Македонија, и кога направи трампа со македонски граничари кои беа киднапирани од косовски бунтовници па мораше да пушти од затвор нивен пајташ, и кога експлозивно го објави својот позитивен став (во „Дневник“) за размена на територии меѓу Македонија, Косово и Албанија (што е инаку современ израз за етничко чистење).

Затоа денеска, кога тој се труди повторно (политички) да оживее, многумина се прашуваат дали Црвенковски му помага нему во име на старото (и екстремно бурно) ривалство или пак Георгиевски му помага на Црвенковски да го сруши Груевски. И тоа од чист инает што му даде политичка партија на тацна а подоцна Груевски го исфрли и успешно го маргинализираше на политичката сцена.

Прашањето за коалицијата меѓу Црвенковски и Георгиевски повторно стана актуелно минатиот викенд, откако стана јасно дека Георгиевски нема намера во име на сензационалното пактирање со својот некогашен смртен непријател, да се повлече од некои свои проблематични ставови. Кои несомнено стануваат проблематични и за Црвенковски кој сега мора да ги проголта изјавите на Георгиевски за величање на Тодор Александров и за размената на територии која Георгиевски пред неколку дена со занес им ја објасни и на хрватските граѓани.

Во една анализа на оваа коалиција, не може а да не се направи брза политичка математика за тоа колкава е вредноста на „акциите“ ако може така да ги наречеме, што овие двајца политички асови ги поседуваат на разбрануваната македонска политичка берза.

А тие стојат отприлика вака. Георгиевски, иако е несомнено харизматичен и талентиран политички лидер, во моментов нема што многу да му понуди на Црвенковски. Неговата политичка сила на теренот е мошне скромна, да не кажеме дека е речиси невидлив ако се мери според тежината на неговата партија ВМРО-Народна. Од друга страна, не е тајна дека шестгодишното владеење на ВМРО-ДПМНЕ остави незадоволни многу членови и приврзаници на оваа партија, независно од тоа што партискиот врв секојдневно се труди да излезе во пресрет на барањата на своите лојални членови и симпатизери. Моќта што ја имаат македонското општество и бизнис сфера, едноставно тоа не го дозволуваат.Но, погрешно е ако Црвенковски а и Георгиевски играат на таа карта. Ниту еден разочаран вмровски член или симпатизер, нема да гласа за Георгиевски ако знае дека со тој чин индиректно го зајакнува блокот на Црвенковски. Такви излети се случија, но обратно кај социјалдемократскиот камп чија периферија, а богами и не само периферијата тивко се прешалта во ВМРО-ДПМНЕ кога виде дека таму ќе добијат вработувања и позиции.

Црвенковски, пак, управува со силно гласачко тело од 370 илјади гласови (според последните избори во 2011), што му дава на Георгиевски широк простор за дејствување, но проблем можат да бидат неговите политички ставови кои СДСМ ги отфрли уште при нивното појавување а тоа го прави и денеска. Оттука, останува фактот дека дружбата со Георгиевски може да се покаже како меч со две острици бидејќи на конзервативното (не во политичка смисла) гласачко тело на социјалдемократите нема да им се допадне цврстото држење на Љупчо за Тодор Александров.

Значи недвојбено е дека акциите на Црвенковски се многу поголеми или кажано со берзански речник котираат повисоко, а единствената корист што лидерот на СДСМ

може да ја извлече од сојузништвото со Георгиевски е таа што во очите на домашната а што ним им е поважно и на меѓународната јавност, ќе покажат дека Груевски е толку лош државен лидер и премиер, што и неговиот ментор се откажал од него и тргнал да го руши заедно со Црвенковски. Или кажано со други зборови, психолошката карта на лоши спомени од транзицијата на која игра ВМРО-ДПМНЕ во нападите кон Црвенковски, е сега сличен адут на СДСМ психолошки да ги убеди гласачите дека Груевски е ѓавол и дека тоа дури го признал и Георгиевски и затоа се здружил со Црвенковски.

Јас не можам да видам ниту една заедничка политика што објективно ги поврзува Црвенковски и Груевски освен ставот дека треба да се постигне договор со Грција за името, што во нормални околности може да биде крупна и легитимна подлога за политичка соработка да не беше ситуацијата во Македонија таква каква што е. Оттука, ќе прогнозирам дека заедничката кауза на Црвенковски и Георгиевски за коалиција со цел рушење на Груевски е можеби политички коректна но е прегруба и дефектна дефиниција за било какво коалицирање, а уште помалку за освојување доверба од гласачи. Затоа уште на стартот на нивната соработка, веќе се лицитира со времетраењето на таа соработка и се предвидува нејзин брз крах. Политички либералниот Георгиевски е преголем ризик за конзервативниот Црвенковски. Георгиевски, не гарантира толку голема добивка за да биде туку така вкалкулиран во предизборните математики на левицата. Црвенковски знае дека ова му е последна шанса и дека нема право на грешка, и оттука ќе биде интересно да се набљудува како ќе се развива овој уникатен однос, особено затоа што до одржувањето на изборите има уште многу време.

Патем, политичката ситуација во Македонија е пред експлозија. Без ниту малку одговорност кон граѓаните двете главни политички партии ВМРО-ДПМНЕ и СДСМ, почнаа изборна кампања, иако до изборите има уште многу време. Нивното одржување според законскиот рок треба да биде во март 2013 година. Законодавецот предвидел рок во кој се одржува предизборна кампања, а штом има рок за такво нешто, треба да има и казни. Баш ме интересира како правната држава ќе ја проголта оваа преуранета кампања. Од законски и од морален аспект.