Георгиевски ја обвини МПЦ за паганство

Антиквизацијата е дехристијанизација на Македонија, и' порачува поранешниот премиер на Црквата

„Можат ли да разберат владиците од МПЦ дека антиквизацијата е всушност и дехристијанизација на Македонија?“ Вака поранешниот премиер и лидер на ВМРО-Народна партија, Љупчо Георгиевски вчера со отворено писмо до јавноста реагираше на соопштението на Синодот на МПЦ за неменување на уставното име. Црквата, меѓу другото, соопшти дека ќе дава поддршка за Владата до крај да истрае во борбата со јужниот сосед во спорот со името, бидејќи Македонија и Македонците, како што оценија црковните власти, се смисла на нашето минато и иднина. 

Но, Георгиевски во ставот на Светиот архиерејски синод препознава „напад врз неговите заложби и активности“. „Затоа и се чувствувам повикан да им објаснам уште еднаш на македонските владици за што всушност се борам“, вели поранешниот премиер во своето опширно писмо до јавноста.

„Во последните 3-4 години, Владата на ВМРО-ДПМНЕ, преку државен инженеринг врши активна промена на македонската историја и комплетно ревидирање на словенските корени во античко-македонски. Дали владиците на МПЦ, воопшто можат да видат дека со додавање на античка Македонија се брише комплетната смисла на мисијата на св. Кирил и св.Методиј и на св. Климент и св.Наум. Ако имаме континуитет, чуму беа потребни мисиите на овие наши светци? Кого учеа? Кого воспитуваа? Кого христијанизираа и покрстуваа? Дека во Македонците има крв на Александар Македонски е основата на грчката пропаганда од крајот на 19 век предводена од страна на владиката Каравангелис. А токму црквата предначеше во таа битка“, вели тој.

Според Георгиевски, словенството е основа на секоја црковна книга во нашата историја. Ако го извадат словенството од историјата на МПЦ, таа ќе остане само кимбал што ѕвечи.

„Антиквизацијата е оддалечување од словото Христово и враќање на многубоштвото и паганството. Паганизам од најмизерен вид е што МПЦ, која заради своето полтронско однесување кон власта, го премолча ставањето на споменикот на Александар Македонски на местото каде што можеше да стои само патронот на Македонија св. Климент. Паганизам е што во секоја нова изградена Македонска црква се црта сонцето – симболот на Амон Ра. Паганизам е статуата на Олимпија која го држи во раце малиот Александар, како пародија за Пресвета Мајка Богородица со нашиот спасител Исус во раце“, вели Георгиевски и додава: „Жал ми е што во мојата реченица, дека македонскиот народ ќе си го проколне мајчиното млеко што се откажа од св.Климент и св.Наум, први се препознаа токму владиците, кои први се повикани и чијашто должност е да го бранат нивното д��ло“.

„Мојата мисија ја гледам само во таа функција, да се остане на заветите на Св. Кирил и Св.Методиј, Климент и Наум. И на крај, јас сакам да ги повикам Владиците од Светиот архиерејски синод јавно да излезат и јавно да побараат прошка од св. Климент за нивното тригодишно живеење како апостати (отстапници) од неговите завети“, вели лидерот на ВМРО-Народна.

Црквата завчера, без да наведе конкретно име, го повика јавно „најгласниот говорител на нечуените фалсификати и лаги за македонската вистина да и' се извини на македонската јавност“. „МПЦ не може, а да не ја искаже својата вчудовиденост и запрепастеност од зачестените изјави на поединци и партии, со кои не само што се удира по јазичниот и национален идентитет на македонскиот народ, туку преку говорењето на невистини до крајни, нечовечки граници, се омаловажува секој труд и секоја жртва на нашите предци, но и на нашите современици, за самостојна и просперитетна Македонија. Го повикуваме нашиот народ не само да остане глув на ваквите користољубиво-должнички емисари на пропагандите од 19 век, туку на легитимен, правдољубив и демократски начин да ги ‘награди‘ со конечен заборав и да им го покаже нивното место во свршеното минато“, соопшти Синодот по седницата што се одржа во чест на јубилејот 45-години од возобновувањето на автокефалноста на Охридската архиепископија. (Д.Т.)