Мислења

Кој се плаши од волкот лош?

Гордан Георгиев

Со сеопозициска соработка ќе биде разбиен митот за другарството помеѓу Али Ахмети и Никола Груевски

ОЧИ ШИРУМ ОТВОРЕНИ

И бидна тој момент. Етничката македонска опозиција си подаде рака за соработка со албанската етничка опозиција. Си дадовме поддршка за предизборна соработка на локалните избори. Тоа може да се ефектуира во конкретна предизборна, мултиетничка коалиција, а може да остане на желба за соработка. Во секој случај, моментот е историски. Табуизираната тема во македонската политика, дека Македонците и Албанците мора да коалицираат од нужност, од немајкаде, од притисок, полека се разбива под притисокот на новото време.

Мене лично ми е криво што ваквиот момент настапува во тешки историски околности, кога Македонците и Албанците мораат да се бранат од своите, од власта. Криво ми е што она што не' обединува е злата крв којашто ја пушти Никола Груевски помеѓу народот. Дека сиромаштијата и неслободата на народот бараат обединувачка визија за спас од овој безизлез. Дека свесната политика на оддалечување од ЕУ и НАТО, диригирана пак од тој истиот Никола Груевски, бара сериозни напори македонските граѓани да се сплотат против домашните петтоколонаши.

Но, тоа е судбината на Македонија и Македонецот. Тоа е пирејот за кој пишуваше Петре М. Андреевски. Кога ни е најтешко, знаеме да бидеме најсилни. Така беше 1903, потоа 1941, па 1991. Конфликтот во 2001 и Рамковниот договор не' натера повторно да соработуваме за да си ја спасиме државата. Денес, во 2012 година, трите клучни предизвици за македонските граѓани се: сиромаштијата, недостатокот на демократија и несигурната иднина надвор од економско-безбедносниот чадор на ЕУ и НАТО. Ете тоа се точките кои не' обединуваат. Тие, и ништо друго. А зарем тоа не се трите клучни потреби кои огромното мнозинство македонски граѓани постојано ги бараат последниве шест години?

Притоа, не бегаме од темите кои не' разијдуваат. Ги има м��огу. Некои се непремостливи, за некои можеби ќе успееме да се договориме. Едно е сигурно, за сите теми отворено и јавно ќе разговараме. Па граѓаните нека проценат. Уште една работа е сигурна: на најшироката македонска јавност добро и' се познати ставовите и позициите на СДСМ околу сите клучни прашања во однос на минатото, сегашноста и иднината на Република Македонија. И познато е дека СДСМ е најголемата опозициска партија во државата. И тврдам дека СДСМ е во позиција да биде на браникот за сите теми кои може да и' наштетат на Република Македонија и македонскиот народ.

Немаме амбиција да ги усогласуваме идеолошките разлики со партиите од македонската десница, имаме амбиција да ја смениме власта и тоа не само за да дојдеме ние на власт, туку за да воспоставиме нормално живеење. Во услови на недемократија, идеологиите немаат простор да виреат, тие се потиснати од „идеологијата“ на насилство, страв, уцени и притисоци.

Соработката меѓу СДСМ и сите партии од опозициониот фронт ќе биде насочена кон решавање на проблемите овде и сега. Народот има потреба од социјален и економски напредок, повторно воспоставување на демократијата и граѓанските слободи, а не од бронзени тотеми кои создаваат поделби и омраза. Ќе работиме на обновување на Македонија како земја на живите луѓе, држава која се грижи за потребите и добросостојбата на народот, држава во која на сила ќе бидат вредности како хуманост, социјална правда и солидарност.

И сега, кој се плаши од волкот лош? Владејачката партија истури еден куп навреди и омаловажувања, подготвува десетици спотови против опозицијата, креира мрачни сценарија за Македонија. Сегашноста е толку мрачна, а утрешнината изгледа уште помрачна. Па ние сме живи луѓе, кои живеат и дејствуваат во Македонија, кои ја сакаат државата и сакаат нормална живеачка за сите граѓани. Зошто ДПМНЕ има толку потреба да ја анатемисува обединетата опозиција? Ако сме толку страшни и опасни за Македонија, нека не' остават на мира, секако граѓаните ќе го препознаат тоа. И Милошевиќ водеше иста таква негативна кампања против Ѓинѓиќ и ДОС, па видовме што се случи. Се' си мислам да не биде на крајот - народот не е во право, и кога греши и кога е во право! Така се однесуваше Милошевиќ, така се однесува Груевски.

Вториот долгорочен позитивен ефект од оваа сеопозициска соработка ќе биде разбивање на митот за другарството помеѓу Али Ахмети и Никола Груевски. Уверен сум дека дури сега ќе се покаже дека има длабока нетрпеливост, длабоко и автентично антиалбанство во врвот на ова ДПМНЕ и длабок презир од страна на ДУИ кон примитивниот национализам и етноцентризам на сегашното ДПМНЕ. Ќе биде многу интересно да се види дали Али Ахмети ќе го следи историскиот чекор на неговиот соперник Тачи. Никола Груевски, родениот популист, нема да има проблем со ништо. Па тој се согласи да ги испазари Хашките случаи и уште многу други нешта само за да остане на власт. Ќе биде интересно да се види како Никола ќе му паѓа на колена на Али молејќи го да направат предизборна коалиција. На вистински тест ќе биде подложена ДУИ да им објасни на Албанците како тоа повеќе од четири години сложно владеат со ДПМНЕ, а Албанците не видоа ништо од тоа. Уште повеќе, ќе биде многу интересно да им се објасни на Албанците како тоа најголемата македонска опозициска партија повторно, како и во 2001 година, смогна сила и верба да им подаде рака на Албанците.

Да резимирам, оваа транснационална и метаидеолошка опозиција нема да мрази никого, нема да се конфронтира бадијала со никого, нема да истура гнев и да долева на тензиите кои веќе ги создаде сегашната Влада. Приказната е едноставна: сакаме да живееме во подобра, понормална, побогата, интегрирана и почитувана Македонија. Во таа битка, вратите за секој добронамерен и/или неодамна „освестен“ субјект остануваат отворени.

(Авторот е потпретседател на СДСМ)

Наш став



Објавувањето колумни и мислења од надворешни автори е одраз на намерата на „Утрински весник“ да биде влијателен глас на заедницата. Но, напоменуваме дека не се согласуваме секогаш со ставовите што ги изнесуваат нашите колумнисти, особено кога станува збор за лични дисквалификации, етикетирања без основа и извртување на контексти со цел да се наштети на други личности од која било сфера. „Утрински весник“ се оградува од таквиот речник и конотации и ги смета за непримерни во јавната комуникација.