18.07.2012, 15:13 Конкурсот за необјавена поема „Григор Прличев“ трае до 30 август
„Детска радост“, која го организира конкурсот по 20. пат, ја доделува наградата „Григор Прличев“ и 1.500 евра
Дваесеттиот јубилеен конкурс на „Просветно дело“ АД, Редакција „Детска радост“ од Скопје за најдобра необјавена поема што ја носи престижната награда „Григор Прличев“, а кој се отвори во февруари, ќе трае до 30 август. Имено, писателите се' уште имаат можност да ги завршат своите дела и да конкурираат на овој единствен конкурс од ваков вид кај нас, кој со години придонесува за негување на овој литературен жанр и за поттикнување на авторите да се охрабрат и да се обидат во ваквиот доста тежок и специфичен литературен вид.
Конкурсот, кој оваа година ја слави својата 20-годишнина, Редакцијата „Детска радост“ го организира заедно со Центарот за култура „Григор Прличев“ од Охрид во чест на големиот македонски поет. Традиционално, доделувањето на наградата се одвива во рамките на манифестацијата „Прличеви беседи“, која секоја година се одржува на почетокот на февруари во Охрид.
Да потсетиме дека во однос на темата на поемите нема никакво ограничување, туку секој автор ја избира по слободен избор. Единствената пропозиција што мора да се почитува е делото да не биде помало од 912 стихови, колку што беше и антологиската поема на Прличев „Сердарот“. Конкурсот е анонимен, а за наградената поема одлучува тричлено жири составено од стручни лица, кои ќе го објават добитникот до 5 октомври.
Според правилата на конкурсот, авторите своите дела треба да ги испратат во четири примероци под шифра. Организаторите се обврзани наградената поема да ја објават во посебна книга до следната манифестација „Прличеви беседи“. Паричната награда изнесува 1.500 евра, а добитникот ја добива и повелбата „Григор Прличев“ и се прогласува за „Поета лауреатис“. (С.У.)
|
