Поглед

И фалбите имаат мера

Јасмина Јовановска

Речиси нема ден, а првиот човек во здравството Никола Тодоров да не излезе пред јавноста или како гостин или во свое име да се пофали за тоа што прави за да го подобро здравството. При тоа се јавува во разни улоги од економист, лекар, до стручњак за протоколи, за лекови и што се уште не.

Само во последните четири дена министерот Тодоров одржа три прес- конференции, а беше присутен и на еден настан со премиерот. Се појави во Црвен крст за донација на болнички кревети, потоа заедно со премиерот ја промовираа новата лабораторија за патологија, појде до Брза помош да каже колку се почитуваат препораките, и врв му беше прес - конференцијата за купување на пижами за пациентите.

Што е многу, многу е. Како што тргнал со настапите Тодоров сигурно веќе го надмина и својот претходник во желбата за сликање и да се прават паради од се' и сешто. Нема да биде ништо чудно ако еден ден министерот излезе во јавноста само за да каже дека Министерството за здравство решило да купува и тоалетна хартија за болниците.

Добро е да се има постојана комуникација со пациентите и да им се помага на здравствените установи за болните да имаат попријатни услови за лекување. Но, не може пациентите само да слушаат што има министерот да каже. Министерот треба да ги чуе и пациентите колку имаат аир од неговите проекти. А критиките треба да се сфаќаат како добронамерни, без разлика дали се позитивни или негативни.

Ја разбираме потребата на министерот да се држи до агендата на Владата 24/7 и да покаже колку е амбициозен како министер за здравство. Но и во фалбите треба да се има мера. Во спротивно, никој нема да го сфаќа сериозно.