Иванов очекува пораки од Бан Ки Мун

Битола - „Штом доаѓа во регионот, тоа укажува дека ќе ни прати некои пораки, а и ние има што да му кажеме и да му пренесеме за тоа што сме го презеле“, ги сублимираше своите очекувања претседателот на државата Ѓорге Иванов, пред доаѓањето на генералниот секретар на ОН, Бан Ки Мун во регионот.

„Заедно со Бан Ки Мун доаѓа и неговиот специјален пратеник Метју Нимиц задолжен за прашањето што го имаме со нашиот сосед. Ќе има прес-конференции и се' што ќе биде тема на разговорите ќе можете да чуете“, рече Иванов при денешната посета на индустриската зона „Жабени“ во Битола.

Иванов вчера дојде во Битола за да се увери лично до каде е снимањето на филмот „До балчак“ на Столе Попов, но и за тоа како течат подговотките за 33. издание на фестивалот „Браќа Манаки“, чиј покровител е претседателот на државата.

Кога веќе дојде до Битола Иванов реши да не ја заобиколи ИЗ „Жабени“, туку лично да се увери до каде е со градбата на фабириката на германскиот инвеститор „Кромберг и Шуберт“.

„Сакав да видам како напредува оваа инвестиција која што создава перспективи пред се' за младите луѓе или оние кои се определиле за техничките струки. Ваква фабрика во нашиот регион е реткост. Градбата напредува благодарение на поволностите и условите што им се овозможиле на инвеститорот за самата градба. Ова воедно е пример и за други инвеститори да дојдат тука и да создаваат нови работни места“, истакна Иванов. (А.Б.)