18.07.2012, 12:03 Влада: Работното време од 8:30 до 16:30 часот
Владата одлучи од утре да прекине важноста на мерките за заштита од топлотниот бран бидејќи според Управата за хидрометеоролошки работи од вчера температурите на територијата на Република Македонија се во рамките на зелената фаза, која се очекува да продолжи и во следните неколку денови. Според УХМР, оваа фаза и температурите кои се прогнозираат се карактеристични за овој период во годината.
Владиниот портпарол Александар Ѓорѓиев на денешната прес-конференција информираше дека од утре работното време на државните органи, установи и институции ќе биде во законскиот рок во времетраење од 8:30 до 16:30 часот.
- Согласно информациите и препораките на УХМР и здравствените институции, Владата одлучи да ја прекине со важност и мерката за забрана на вршење работи на отворено, која претходно важеше во периодот од 11 до 17 часот, рече Ѓорѓиев.
Согласно препораките, како што посочи, се укинуваат и останатите мерки од Акцискиот план за заштита од топлотен бран со исклучок во градинките да не се практикува физичка активност и да не се изнесуваат децата на отворено по 11 часот.
Портпаролот истакна дека единиците на локалната самоуправа, Црвениот крст на Република Македонија и центрите за социјални работи продолжуваат со обврската поактивен пристап во насока на пружање помош на осамените стари изнемоштени лица и бездомници.
Од Владата потсетуваат дека населението во целиот летен период потребно е да ги почитува општите мерки за заштита на здравјето.
- Во текот на екстремно топлите денови да се остане повеќе во затворени и климатизирани простории, да се носи светла и лесна облека, заштитни очила и капа, да се внесува помало количество храна, претежно овошје и зеленчук, а помалку мрсна храна, да се внесува поголеми количества вода и да се избегнуваат алкохолните пијалоци, а хронично болните лица редовно да ја земаат препишаната терапија, во консултација со матичните лекари, рече владиниот портпарол.
Владата и надлежните институции продолжуваат со внимателно следење на состојбите и движењата, и доколку се појави потреба, како што нагласи Ѓорѓиев, веднаш ќе бидат преземени дополнителни мерки врз основа на препораките на надлежните институции.
|
