18.07.2012, 14:48 Германскиот ВАЦ тајно ја продаде „Политика“
Најстариот дневен весник на Балканот продаден на фирма со седиште во Москва и со српски газда
„Политика“ најстариот весник на Балканот од понеделник 16 јули има нов сопственик. Педесет отсто од капиталот премина во рацете на компанијата „Ист медија груп“ од Москва. СНС и УРС тврдат дека зад купопродажбата стои ДС и како што велат „со нив поврзани тајкуни“.
На веб-страницата на Агенцијата за стопански регистри само пишува дека промената на сопственичката структура е направена на 16 јули 2012 година и дека е избришано деловното име на австриската компанија „Ост Холдинг ГМБХ“, а запишано е „ООО Ист Медија Груп“, со адреса во Москва и се наведува дека нејзиниот удел е 50 отсто.
Српската напредна партија (СНС) соопшти дека е „скандалозно и срамно тоа што најстарата новинска куќа во Србија ’Политика‘ преку ноќ, без ничие знаење, нетранспарентно, го промени сопственикот“ како и дека зад промената на сопственикот на „Политика“ стои обид на Демократската партија (ДС) да се „задуши медиумската слобода“. СНС прашува дали зад таа заткулисна работа стои Мирослав Богичевиќ и Душан Петровиќ или можеби Божидар Ѓелиќ, како и тоа дали ДС мисли дека сите весници во Србија, како „Блиц“ треба да бидат нејзино партиско гласило“, пишува во соопштението на напредњаците. Таа партија бара од надлежните државни органи по итна постапка да соопштат како „во глува доба од ноќта, крајно перфидно, е извршена промена на сопствеништвото на ’Политика‘, новинска куќа во која државата има 50 отсто удел“. ДС се огласи со демантирање на овие наводи и со оцена дека се „опасни за демократијата“.
Германската компанија ВАЦ во средината на 2010 година соопшти дека одлучи да го заврши ангажманот во Србија и дека постепено се повлекува од земјата незадоволна од условите за работење. Директорот на германскиот ВАЦ, Бодо Хомбах тогаш за тоа „во доверливо писмо“ го извести претседателот на Србија, Борис Тадиќ. ВАЦ на почетокот на април и' понуди на државата да ги откупи нејзините 50 отсто од сопственоста во „Политика“ за 4,7 милиони евра и преземање на „одредени обврски“, не прецизирајќи кои. Да потсетиме, во составот на „Политика НМ“ работат дневниот весник „Политика“, „Спортски журнал“ и печатница.
|
