18.07.2012, 13:32 Груевски бара од иселениците да инвестираат во Македонија
Денеска и утре во Скопје се одржува трета годишна конференција на иселеничките организации
Трета годишна конференција на иселеничките организации денеска и утре се одржува во Скопје. Конференцијата, на која се присутни претставници на иселенички организации од Европа, Австралија, Северна и Јужна Америка, денеска ја отвори премиерот Никола Груевски.
- Ваквите собири и манифестации имаат додадена вредност и претставуваат силен поттик да останеме единствени, непокорни, силни и истрајни пред предизвиците со кои се соочуваме денес, да ги потврдиме и промовираме нашата традиција и нашиот македонски идентитет и македонски јазик, рече премиерот Груевски и додаде дека интерес на Владата и натаму ќе остане зачувувањето и унапредувањето на врските и соработката со нашата дијаспора.
Тој им оддаде признание на иселениците кои низ разни форми и дејствувања работеа на зачувување на врските со својата држава, на зачувувањето и промовирањето на националниот и културниот идентитет на Македонците во светот, како и промоцијата на државните интереси на Република Македонија. Притоа ги охрабри да продолжат во таа насока, посебно сега кога Македонија се бори за своето место во развиените европски демократии и пазарни економии.
Посочувајќи ги реформите што Владата ги презеде за да ја подобри бизнис-климата и да привлече странски инвеститори рече дека особено е значајна и соработката и привлекувањето инвестиции од нашата дијаспора, која има значајна улога во спојувањето на два глобални приоритета за македонската економија - поттикнувањето странски инвестиции и извозот на македонскиот производ.
- Очекуваме вие да најдете цврст економски бизнис-интерес во таквите проекти. На наша страна е да создадеме соодветна бизнис-клима. Емотивната страна во сето тоа треба да биде, условно да кажеме, некој вид катализатор. На ваша страна тоа да биде исполнување на желбата да бидете во што е можно потесен контакт со татковината, порача на дијаспората премиерот Никола Груевски.
Ова е најмасовен собир на иселеници. Како што рече директорот на Агенцијата за иселеништво Васил Наумов, присутни се 140 организации.
Република Македонија, соопшти Наумов, има интерес иселениците да се интегрираат што повеќе во општествата во кои живеат, но и да го зачуваат својот идентитет, јазик и култура. Тој ги повика иселениците активно да лобираат за негување на јазикот.
На конференцијата која е во организација на Агенцијата за иселеништво, ќе се дебатира за мајчиниот јазик, зачувувањето на културата, државјанството, а ќе биде организиран и мини бизнис форум.
|
