Мое ќоше

Поздрав до Андерс Фог Расмунсен

Ерол Ризаов

Вчудовидува леснотијата со која се зазема срамна позиција кон Македонија

Три дена пред самитот на НАТО во Чикаго почитуван генерален секретар, господин Андерс Фог Расмунсен, повторно ги попаривте граѓаните на Македонија. Првиот пат по пресудата на Меѓународниот суд во Хаг спокојно, без окото да ви трепне, полеавте со студена вода два милиона луѓе затоа што светското право и правда само во одредени случаи се под стандардите на Алијансата. Денес, преку Радио Слободна Европа, каква симболика, истуривте жешка вода врз нашите глави соопштувајќи ни дека за нас вратите на Слободна Европа се затворени додека не се реши спорот за името на Македонија што на очиглед на цел свет ни го наметна Грција.

Не оти оваа евровизиска стара песна не ја знаеме сите, сепак, повторно и повторно вчудовидува леснотијата со која се зазема срамна позиција кон една мала европска држава која не преставува опасност за никого и згора на тоа демонстриравте крајно понижувачки однос кон нејзините мирољубиви и сиромашни граѓани кои даваат речиси целосна поддршка за евроатланските интеграции на Македонија гледајќи ја само таму својата иднина. Поддршка каква што НАТО и ЕУ не уживаат ниту кај своите редовни членки.

Господине Расмунсен, знам дека оваа работа не трпи емоции, ниту патетики кога се во прашање интересите и правилата на консензус во НАТО Пактот. Тоа добро го знаат и македонските политичари и граѓани, но и нашите војници кои учествуваат во мисиите на НАТО. Таму кога добиваат борбени задачи и кога ги изложуваат своите животи на опасност нашите војници никој не ги прашува дали го решиле спорот со Грција. Господине Расмунсен дали Вие чекате да ни донесат мртовечки сандаци од Авганистан, па малку да ја смените грубата и навредлива реторика. Не дај боже, тогаш што и да кажете, кај нас, никој нема да Ви верува. И Вам и на НАТО. Се разбира, дека знаеме дека Вие пред јавноста не ги соопштувате вашите лични ставови, но вџашува вашиот избор тоа да го правите на начин кој не приличи на еден висок функцинер на Алијансата. Вашите мотиви да се поддржува еднострано Грција се многу подлабоки отколку одбраната на НАТО- консензусот за кој се согласаувам дека е клучен елемент да не дојде до распад на Алијансата. Но, исто така се познати и механизмите кога порамноправните во НАТО сакаат една работа да се заврши со заеднички прифатливо решение.

Почитуван господине Расмунсен, припаѓам на еден мал дел македонски новинари кои ја критикуваат Владата и државниот врв што не ги забрзуваат процесите за евроинтеграција на нашата земја со изнаоѓање на заеднички прифатливо решение со Грција за што тврдите дека и Вие се залагате. За тоа во нашата средина сме прогласени за предавници, непријатели на татковината, грчки платеници и лобисти. Тоа воопшто не ми пречи да ја повикувам на одговорност владата и премиерот да ги бара грешките и во сопствениот двор, а не само во туѓите, и да гледа на компромисот како на европска вредност од исклучително значење за иднината на Република Македонија и нејзините граѓани. Тоа на Балканот господине Расмунсен воопшто не е лесно и без последици. Но, гледајќи од историски аспект свесно го прифатив тој ризик да бидам изложен на столбот на срамот како некој изрод што чепка во светите работи длабоко убеден дека оваа светска будалштина и голем срам за големите сили еден ден ќе се разоткријат и Република Македонија ќе си остане Република Македонија, како единствена држава во светот со истото име што го носи 68 години. Но, господине Расмунсен до тој ден можат да поминат и децении исклучително значајно време изгубено неповратно за граѓаните на Македонија и нашите деца. За на крајот повторно да прифатиме компромис длабоко свесни дека работите секогаш завршуваат во вакви случаи без победници и поразени. Основниот мотив за што денес Ви се обраќам е што соседна Грција длабоко зафатена со свои проблеми не дава ни пет пари за било какво решение, а да не зборуваме за заеднички прифатливо. Со тоа сите наши напори паѓаат во вода. Дали со вашиот ригиден став дека не е регистриран напредок од 2008 година наваму, односно од Букурешт, го имате предвид тоа дека Грција всушност не сака решение, односно во вакви услови нема капацитет за решение. Дали тоа значи дека НАТО алијансата и покрај хашката пресдуда ќе чека со децении Грција да се стабилизира економски и политички.

И во оваа прилика сакам да ве потсета�� дека Македонија беше сојузник на НАТО уште пред да се формира Алијансата. Со основачите на НАТО бевме сојузници во Втората светска војна борејќи се на страната на големата Антифашистичка Антанта. Видете ги телеграмите до АСНОМ.