Претходен број

Андов: Неправедно сум вовлечен во „пензиската афера“

Целта е да го одвлечат вниманието од моите критики спрема власта, вели пратеникот од ЛП

Пратеникот на Либералната партија Стојан Андов се правда дека аферата со примањето пензија и пратеничка плата била исконструирана за да се извлекло неговото вниманието од актуелните проблеми и да се натерал да се занимава со тоа прашање. Тој вчера на прес-конференција повторно ги отфрли обвинувањата дека неосновано земал и плата и пензија затоа што реагирал до Фондот за пензиско и инвалидско осигурување. Покрај Андов, и пратеничката на ВМРО-ДПМНЕ и претседател на Законодавно-правната комисија, Благородна Дулиќ, примала и плата и пензија, но и вчера таа не излезе да објасни како се случило да има примања по две основи.

„Моето вовлекување во т.н. пензиска афера е неосновано, тоа е измислена работа и има цел да ме натера да се занимавам со ова прашање, наместо да продолжат со критиките и објективните укажувања на штетноста на економската политика што ја води Владата. Имам документи со кои можам да докажам дека цело време совесно и одговорно се држам до законите. Јас бев во работен однос до 12 април 2008 година, но тогаш се распушти Собранието и бидејќи ми престана работниот однос, побарав пензија. Кога повторно бев избран и ми беше верификуван мандатот, засновав работен однос“, истакна вчера Андов. Тој додаде дека во јули минатата година било донесено решение од страна на Фондот дека покрај платата му припаѓа и надомест во висина од 30 отсто од пензијата. Но, откако во декември минатата година беше донесен Закон со кој се укинува правото за добивање дел од пензијата, според Андов, Фондот имал должност да донесе решение дека престанува правото на овој процент и тој очекувал дека така ќе биде постапено. Но и покрај тоа што тој реагирал во Фондот, парите и натаму пристигале. Андов очекува од Фондот да му посочат на која смета да ги врати овие средства, а доколку во рок од шест месеци не добие одговор, вели дека парите ќе ги предаде во сопственост на Здружението на новинарите на Македонија.

Услови за добивање пензии пред да станат пратеници имаа и пратеникот и претседател на Социјалистичка партија, Љубисав Иванов-Ѕинго, како и претседателот на ВМРО-Македонска, Борис Стојменов.

„Јас сум пратеник и како пратеник си примам плата и иако имам исполнето услови не сум пензиониран затоа што досега не сум повел барање за одење во пензија“, вели пратеникот Иванов.

Незаконското примање средства и од Фондот за пензиско и по основа на пратеничка плата беше обелоденет на Законодавно-правната комисија, каде што Дулиќ призна дека таа и Андов примале 30 отсто пензија и плата. (Св.У.)