Разрешен ректорот на Тетовскиот универзитет
Министерот за образование и наука експресно потпишал решение за смена на Агим Вела
Гојко Ефтоски
Жаклина Хаџи-Зафирова
ТЕТОВО - Втор ден напната атмосфера на Државниот универзитет во Тетово по четврточната драма кога експресно е сменет првиот човек на оваа институција. Новоименуваниот в.д. ректор Агрон Река во четвртокот попладне, наводно, со полиција упаднал во просториите на довчерашниот в.д. ректор Агим Вела, мавтајќи со решение од министерот за образование, Перо Стојановски, за неговото именување.
Атмосферата се вжештила кога новиот в.д. ректор Река побарал од Вела да биде извршено примопредавање, за кое тој тврди дека е незаконски. Река и оние што го придружувале ги зафатиле просториите со известување дека министерот за образование и наука извршил кадровски промени. Река, инаку доцент на Природно-математичкиот факултет на овој универзитет, вчера не сакаше да контактира со македонските медиуми, иако за албанските изјавил дека промените биле извршени поради пропустите на Универзитетот.
Од Министерството за образование и наука вчера потврдија дека министерот донел решение за промена на ректорот и на членовите на Сенатот. Но, се повикуваат на владина одлука која се базира на претходните инспекциски извештаи на повеќе институции кои утврдиле финансиски дубиози и пропусти на Универзитетот. Смената на ректорот доаѓа и по се' погласните забелешки на ДУИ за работата на министерот Перо Стојановски. Од партијата на Ахмети отворено кажаа дека не се задоволни од работата на министерот за образование затоа што не презел ништо околу Тетовскиот универзитет.
„Во основа се кршат законските права и автономијата на Универзитетот. Овде веќе беше отворена постапка за избор на нов ректор, место кое се испразни со заминувањето на Сади Беџети на нова должност. Изминува последниот ден за пријавување кандидати за ректорската должност. Конкурсот се базира на критериуми и норми од Законот за високо образование и Статутот на Универзитетот“, вели разрешениот в.д. ректор, Агим Вела.
Според него, ректор може да биде лице кое има звање редовен професор, а човекот што го поставува министерот е две скалила подолу. „Во целина решението на министерот за образование и наука е неправилно и незаконито. Мојот избор за вршител на должност на која сум од 14 април годинава, беше спроведена редовно и законски од Сенатот како единствено надлежен орган на Универзитетот“, додава Вела.
��д она што може да се дознае, со решението, министерот за образование и наука го разрешил Сенатот и вршителот на должноста ректор, со образложение дека „Сенатот бил нелегитимен“. Меѓутоа, Агим Вела смета дека зад сите овие случувања „е јасна политичката заднина на потегот“.
Доскорешниот ректор, а сега градоначалник на Тетово, Сади Беџети, потегот на министерот го смета за упад во демократијата, особено и поради тоа што се поставуваат несоодветни кадри со прописите за високо образование и Статутот на Универзитетот. „Сметам дека ова е удар врз демократијата, но и интенција да се намалат или елиминираат резултатите што ги постигнавме“, вели Беџети.
Со новоименуваниот в.д. ректор, Агрон Река, вчера не успеавме да исконтактираме. Тој избегна средба со новинарите на македонските медиуми. Според новинарите на албански јазик, Река изнел забелешка на својот претходник, дека наводно не доаѓал редовно на работа, дека во работата на Универзитетот имало пропусти и нерегуларности и дека промените биле извршени за доброто на Универзитетот. Река најавил и други кадровски промени во ресорите. На новинарите им пренел и дека треба да се сретне со неговиот претходник.
„Точно е дека министерот донел решение за разрешување на членовите на Сенатот на тетовскиот универзитет, како и за поништување на сите одлуки, меѓу кои и одлуката за именување на в.д. ректор“, потврдија вчера од министерството. Ваквата одлука на министерот ја правдаат со одлука на Владата и на претходна одлука од Собранието да се преземат сите законски мерки поради откриени финансиски дубиози на универзитетот.
Смената на ДУТ, според претседателот на Нова демократија, Имер Селмани е противуставна и затоа тој најави дека ќе покренат постапка пред Уставниот суд. „Ова е брутално кршење на Уставот и законите. Се работи за суспендирање на ректорот и Сенатот надвор од сите правила или претходно информирање на јавноста за противзаконски дејствија“ изјави Селмани.
Пратеникот Сафет Незири од ДУИ тврди дека одлуката на министерот е законска бидејќи за тоа имало претходен заклучок на собраниска седница да се преземат сите законски мерки во универзитетот. „Ваквиот потег никако не може да се нарече газење на универзитетската автономија бидејќи основач на ДУТ е Собранието“, рече тој. |
