Претходен број

Шврговски ќе бара разрешување на кумановскиот обвинител

Како дозволи Советот да му се случат две утки и да избере обвинители со криминално досие?

Гордана Дувњак

Државниот јавен обвинител Љупчо Шврговски пред два дена и официјално добил писмено известување потпишано од кумановскиот јавен обвинител Валентина Стојановска, во кое таа го информира дека против лицето Иса Сулејмани се води истражна постапка за злоупотреба на службената должност и овластување. За вакво нешто би немало потреба доколку осомниченото лице минатиот петок не беше избрано за јавен обвинител токму во кумановското обвинителство.

Ова е втор скандал едноподруго за кој веќе пишуваше „Утрински весник“, а кој сериозно го доведува во прашање угледот на Советот на јавни обвинители.

„Во врска со овој навистина скандалозен избор на обвинители, би сакал да потсетам дека со министерот за правда сме членови по функција во Советот. Иако имаме право на глас, немаме обврска да ги гледаме биографиите и да вршиме интервјуа на кандидатите. Тоа е работа на останатите членови, кои се избрани од редот на обвинителската фела, а тројца членови се предложени од Владата, а избрани од Собранието“, потенцира Шврговски.

Првиот човек на Обвинителството признава дека е затечен од она што се случило со последниот избор на обвинители и затоа вели дека на наредната седница ќе се заложи да се установат нови механизми при проверката на кандидатите кои ќе претставуваат брана за евентуално повторување на избор на кандидати кои не би смееле да ја извршуваат оваа значајна функција.

„Ќе иницирам постапка за донесување одредби, со кои ќе се регулира и одговорноста на членовите на Советот на јавни обвинители, бидејќи единствено членовите на ова тело и на Судскиот совет не носат одговорност за лошите одлуки во своето работење. Недопустливо е функционери што имаат ваква важна и висока висока позиција да не одговараат за пропустите што ги направиле“, оценува Шврговски.

Тој очекува дека веќе на наредната седница ќе се отвори прашањето за кумановскиот случај и оти веднаш ќе се поведе постапка за негово разрешување.

Поранешниот вработен во кумановскиот Катастар Сулејмани беше избран минатиот петок, заедно со 30 други обвинители. Но, за разлика од Хани Абдула, кој самиот си даде оставка откако се откри скандалот дека пред три години бил разрешен од судиската функција, Сулејмани даде свечена изјава со што и официјално стана кумановски обвинител.

Моментално не може да се добие официјален коментар од Советот за јавни обвинители, бидејќи претседателката Елена Гошева службено е отсутна, а нејзиниот заменик нема овластување да зборува. Но, неофицијално се дознава дека и во двата случаја овие факти не им биле познати на членовите на Советот.