Наместо Јавното станбено, две акционерски друштва
Севкупниот имот на претпријатието ќе биде сопственост на државата
Од Јавното претпријатие за стопанисување со станбен и деловен простор набрзо ќе произлезат две акционерски друштва. Ова се предвидува со Предлог-законот за трансформација на ова јавно претпријатие, според кој, претпријатието ќе се подели на две акционерски друштва во државна сопственост.
Според предложените законски одредби, ЈПССДП ќе се трансформира во Акционерско друштво за изградба и стопанисување со станбен простор и деловен простор од значење за државата и во Акционерско друштво за стопанисување со деловен простор во државна сопственост. Притоа, севкупниот недвижен имот на претпријатието ќе биде запишан во Катастарот на недвижен имот како сопственост на државата, а со него ќе стопанисуваат акционерските друштва.
Имотот со кој Јавното претпријатие се здоби со трансформацијата на претпријатијата со општествен капитал, исто така, ќе претставува имот на РМ, а со него ќе стопанисува АД за изградба и стопанисување со станбен и деловен простор од значење за државата.
Од посебно значење е што Акционерското друштво за изградба и стопанисување со станбен и деловен простор ќе може да гради станови за таканаречено непрофитно домување, да стопанисува со деловниот простор кој е од значење за државата, ќе може да гради станбен и деловен простор за продажба и ќе стопанисува со станови и деловни простории, кои се во негова сопственост. Исто така, ќе се грижи за инвестиционо и тековно одржување на севкупниот станбен и деловен простор, кој е во негова и во сопственост на државата или му е даден на стопанисување по друг основ. Ова АД ќе има задача и да ја заврши изградбата на Градскиот стадион во Скопје, а во иднина ќе врши и наплата на државни побарувања, ќе спроведува јавни продажби и друго. (Б.А.) |
