Ако пропадне еврото, ќе пропадне и Европа

Со овие зборови Меркел вчера од пратениците во Бундестагот побара согласност за мерките за стабилизирање на еврото

Кризата на еврото е егзистенцијална закана за Европа. Со ова предупредување вчера германската канцеларка Ангела Меркел излезе пред пратениците во Бундестагот, барајќи согласност за пакетот мерки за стабилизирање на еврото.

„Ако пропадне еврото, тогаш ќе пропадне и Европа“, драматично предупреди Меркел во владината декларација, која наиде на критики и на осуда кај опозициските политички партии.

Нагласувајќи дека Европа се наоѓа пред еден од најголемите тестови во последната деценија, Меркел изјави дека монетарната унија, всушност, е друштво што ја дели истата судбина во оваа длабока криза. Оваа криза, според Меркел, мора безусловно заеднички да се надмине. „Станува збор, ниту помалку ниту повеќе, за зачувување на европската идеја“, рече Меркел. Таа најави заострена контрола во регулирањето на финансискиот пазар, па дури и можност, ако има потреба, да се преземат чекори и без меѓународна согласност. Ваквите чекори, рече таа, можат да се остварат само доколку со нив не се прави штета за Германија.

Пратениците во Бундестагот, најверојатно в петок, ќе одлучуваат за законот за спас на еврото, чиј нацрт владата во Берлин го усвои пред неколку дена. Со нацртот на овој закон се утврдува германското учество од најмалку 148 милијарди евра во вкупно предвидената сума од 750 милијарди евра за спас на еврото. За овој документ е неопходна согласноста на двата дома на парламентот.

„Станува збор за многу повеќе отколку само за валутата. Монетарната унија е една судбинска заедница. Тоа е наша историска задача, зашто ако еврото не успее, тогаш тоа значи неуспех за Европа“, рече Меркел.

Меркел објасни дека покрај совладувањето на актуелната криза би морало да се преземат и превентивни мерки за иднина. Затоа таа побара нова култура на стабилизација во Европа, што би требало да обезбеди консолидација на државните буџети и монетарна стабилност. За тоа да биде постигнато, државите на ЕУ мора да ги обелоденат сопствените слабости, вели канцеларката. „Цврсто сум убедена дека сите држави-членки мора да го забрзаат консолидирањето на националните буџети. Дури тогаш обидите за спас можат да имаат ефект. И ние Германците, и тоа не од вчера, туку повеќе од 40 години, правиме повеќе долгови отколку што е потребно. И ние живееме на кредит“, нагласи Меркел.

Според неа, Германија од 2011 година мора да штеди и тоа разумно. Меркел вети дека на глобално и на европско ниво ќе се залага за оданочување на финансиската бранша, која мора да учествува во трошоците што произлегуваат од кризата. Како алтернативи, таа ги наведе данокот на финансиски активности, или данокот на финансиски трансакции. Доколку до самитот на Групата 20 во јуни не се постигне пробив во таа насока, германската канцеларка, ќе се залага за европско решение во таа смисла.

Шефот на пратеничката група на најголемата опозициска партија, Социјалдемократската, Франк-Валтер Штајнмајер, ја критикуваше владината изјава на Меркел и истакна дека СПД ќе даде согласност за пакетот мерки за спас на еврото само доколку постојат конкретни ветувања на владата за поостро регулирање на финансиските пазари. Освен тоа, Штајнмајер уште еднаш ја обвини Меркел за продлабочувањето на должничката криза во ЕУ. „Доколку се реагираше порано, ќе се спречеше прелевањето на кризата. Вие пет седмици не направивте ништо, негиравте и одолговлекувавте. Тоа е грешката за која ве обвинуваме“, рече Штајнмајер, префрлајќи и' на Меркел дека со одолговлекувањето ја ставила на коцка германската водечка улога во Европа и оти Германија е претворена во кочничар во Европа.

Еврокомесарот за економски и монетарни прашања Оли Рен, пак, вчера изјави дека министрите за економија на членките на ЕУ донеле „уверлив“ пакет мерки за заштита на еврозоната.

„Проблемите треба да се спречат и да се решаваат пред да ескалираат и да ја предизвикаат кризата“, предупреди Рен, појаснувајќи ги пред Европскиот парламент причините за пакетот мерки, што во изминатите денови ги составија министрите за економија на членките на ЕУ за да ја заштитат еврозоната. „Подобро е да се има противпожарен тим кога избива пожар, отколку да се составува кога огнот веќе ќе ја зафати шумата“, изјави Рен. Тој нагласи дека станува збор за „уверлив“ пакет мерки што на граѓаните и на пазарот им „покажува дека ќе биде сторено се' што е потребно за да се заштит�� еврото“.

Рен рече дека Комисијата во наредните две седмици ќе даде оцена на мерките за консолидација на јавните финансии што ги усвоија членките на ЕУ, пред се', Шпанија и Португалија. (Според агенциите)