„Државна лотарија“ ги исплати првите поголеми добивки

„Државната лотарија на Македонија“ вчера ги реализира исплатите на првите добитници со поголеми добивки во износ од 103 илјади и 62.143 денари за Ново лото 7/34, како и од 100.000 денари за инстант-лотарија.

Добитник на 103 илјади денари е Г.С., пензионер од Кратово, кој со уплата на 540 денари играл систем со девет бројки и добил два погодока за шестка и други погодоци за петки и четворки. Уплатата ја извршил на бензинска пумпа „Макпетрол“ во Кратово.

Битолчанецот М.Х., кој извршил уплата за шест колони со 90 денари за второто коло на лото во „Тобако“ во Битола, подигна добивка за шестка со износ од 30.254 денари. О.Ј. од Скопје, пак, за 50 денари добила шестка со уплата за третото коло на Ново лото 7/34 во „Стоп шоп“ во Сингелиќ и се стекна со добивка од 62.143 денари.

Семејство од Скопје за инстант-лоз „Ѕвезден пат“, купен на бензинската пумпа на „Макпетрол“ во Влае во вредност од 50 денари, ја доби првата добивка од 100.000 денари. Досега се исплатени и две добивки од по 10.000 денари за инстант-лоз „Среќни тркала“ со вредност од 30 денари, едниот купен во Драчево, а другиот во Прилеп. (МИА)