Еклстоун удри по новите тимови

Првиот човек на Формула 1 ги нарече инвалиди Хиспанија, Вирџин и Лотус

Познат по тоа што не мисли многу што ќе каже, Берни Еклстоун им се нафрли на новите тимови во Формула 1, нарекувајќи ги „засрамувачки инвалиди“. Хиспанија, Вирџин и Лотус се трите нови екипи што дебитираа сезонава, но во досегашните 17 трки ниту една од нив нема освоено ни бод. Најблиску до тоа беше Лотус, чијшто возач Хеики Ковалаинен беше 12. во трката за Големата награда на Јапонија и благодарение на тој пласман неговиот тим е десетти во шампионатот на конструкторите. Со оглед на малите индиции дека некој од нив до крајот на сезоната ќе прокнижи поен(и), првиот човек на Формула 1 удри по новаците.

„Тие не прават ништо за нас. Тие се срам“, изјави тој за „Фајненшал тајмс“. „Треба да се ослободиме од некои од тие инвалиди“.

Се чини дека неговиот напад е насочен повеќе кон Хиспанија отколку кон другите два тима, бидејќи Еклстоун додава оти Лотус вреди да се зачува, а за сер Ричард Бренсон смета дека би требало да инвестира повеќе за да му помогне на Вирџин.

„Ричард би требало да вложи малку пари таму, зарем не? Тој би можел да го направи тоа што основачот на Ред бул, Дитрих Матешиц, го стори“, вели Еклстоун.