Поен по поен за Јотовски во Чиле

Томислав Јотовски го освои вториот АТП-поен во Чиле, успешно стартувајќи на третиот фјучерс во низа во Сантјаго, кој се игра неделава на земјени терени и за награден фонд од 10.000 долари. Тој беше поразен во третото квалификациско коло, но доби шанса да настапи на главниот турнир по откажувањето на еден од учесниците, и тоа само пет минути откако се пријави. Оттаму и изгубениот прв сет без освоен гем против Роберто Ортега-Олмедо од Шпанија, 811. на АТП-листата, но другите два ги доби убедливо со 6-2, 6-1. Следен противник денеска ќе му биде подобриот меѓу првиот носител Иво Клец (287.) од Словачка и Гонкало Переира (792.) од Португалија, кој му беше партнер во двојки на претходните два турнира во Чиле.

Повремениот македонски репрезентативец продолжува со успех и во дубл по пласманот во полуфиналето на двата претходни фјучерса. Заедно со Чилеанецот Карлос Гонзалез-Леива славеа на стартот со 6-3, 4-6, 12-10 против домашните претставници Родриго Енсинас и Виктор Нуњез.

Освоените поени го искачија 20-годишниот Јотовски неколку стотини места на двете листи на АТП, па во сингл сега е 1255., а во двојки 1095. (Р.Д.)