Петровски го подели 26. место на СП за млади

Игор Петровски (рејтинг 2152) со делбата на 26. место меѓу 140 шахисти до 16 години е најуспешниот во деветчлениот македонски тим што настапи на Светското првенство за млади во грчкото гратче Порто Карас. Петровски освои 6,5 поени од 11 партии и заврши на 46. позиција според Бухолц.

Драгана Николовска (1752) со половичен ефект од 5,5 поени е 49. во категоријата до 14 години, а Тони Лазов со 5 поени заврши 98. меѓу врсниците до 10 години. Со по 4,5 поени Кренар Таири (1634) го освои 105. место меѓу момчињата до 14 години, Бојана Бејатовиќ (1891) е 68. кај девојчињата до 16 години, а Моника Стојковска (1928) 56. меѓу девојките до 18 години. По 4 поени собраа Михаил Таушанов (1977) за 94. место меѓу шахистите до 18 години и Симона Лакинска за 104. место меѓу девојчињата до 14 години.

Александар Константинов со 3,5 поени е 140. во категоријата до 12 години. (Р.Д.)