Претходен број

Без аранжман со ММФ, ќе платиме тројно

Според експертите, аранжманот би не' чинел од 2 до 3 пати поевтино од задолжувањето преку еврообврзници

Александрија Стевковска
Нина Нинеска-Фиданоска

Избегнувањето да се склучи аранжман со ММФ скапо ќе ја чини земјава, сметаат експертите. Според нив, аранжманот со ММФ би не' чинел од 2 до 3 пати поевтино од комерцијалното задолжување преку еврообврзници. Тие ја обвинуваат Владата дека поради ароганцијата и намерата по секоја цена да се заобиколи контролата во трошењето на буџетските пари, го избира потешкиот пат за излез од кризата.

Ова следува откако властите, по еднонеделните средби со тимот на ММФ, дефинитивно објавија дека засега не се заинтересирани за аранжман.

„Јас сум приврзаник на мислењето дека во овие кризни времиња аранжманот со ММФ нема алтернатива, но со оглед на тоа што Владата никако не сака мониторинг во делот на фискалната политика, односно на буџетските трошења, таа што поскоро ќе мора да идентификува реален извор на средства, од каде што ќе го покрива големиот дефицит на тековната сметка, кој ќе изнесува најмалку 14 отсто од БДП“, вели Абдулменаф Беџети, професор на Универзитетот на ЈИЕ.

Според него, постојат извори на средства од каде што ќе се покриваат финансиските дупки, но прашање е која е цената што за нив ќе се плати, со оглед на фактот дека комерцијалното задолжување е многу поскапо од склучувањето аранжман со ММФ.

„Аранжманот со ММФ би не' чинел од 2 до 3 пати поевтино од комерцијалното задолжување преку еврообврзници“, објаснува Беџети.

Во однос на намерите на Владата да повлече 77 милиони долари од нашата квота во ММФ, Беџети вели дека и во тој случај станува збор за кредит.

Според него, треба да се постави и прашањето како нашава држава ќе успее да ги обезбеди дури и комерцијалните кредити, бидејќи Македонија го нема кредитниот рејтинг што го имаше пред 6 месеци.

„Со оглед на фактот дека рејтингот се влошува, се' помали се шансите за обезбедување на овие средства“, вели Беџети.

Професорот на ЈИЕ е убеден дека македонските власти многу скоро, сепак, ќе се одлучат на опцијата - склучување аранжман со ММФ.

И професорот Панче Јовановски, проректор на Европски универзитет, смета дека аранжман и' е потребен на Македонија.

„Патот кон ММФ е јасно трасиран и одложувањето на склучување аранжман со Фондот не е препорачливо за организам кој е болен, како што е нашето стопанство“, вели Јовановски.

Според него, ММФ не е бауч и не треба да се сфаќа како таков.

„Парите што би се земале од ММФ и не се толку важни, бидејќи краткорочно, моментно, ќе ги решат проблемите. Многу позначајна е долгорочната перспектива, која ја нуди аранжманот со ММФ“, смета Јовановски.

Освен експертите, и стопанствениците јавно, извесен период наназад, бараат да се склучи аранжман со ММФ, како најевтин начин на кредитирање на земјава. Според бизнисмените, парите што би се добиле со аранжман, би го намалиле внатрешното задолжување на Владата и ќе го релаксираат стопанството. Со избегнувањето поитно да се склучи аранжман со ММФ, Владата само придонесува кризата да навлезе подлабоко во порите на стопанството и да ги влоши економските услови, кои и така се лоши. Бизнисмените веќе алармираа дека сето тоа придонесува потенцијалните странски инвеститори да се откажуваат од Македонија. Домашните фирми се жалат дека почнале да ги губат странските партнери. Стопанството е во сериозен пад, а на голем број фирми им се заканува банкрот, алармираат стопанствениците.

Владата, засега, се' уште стои на ставот дека аранжман со ММФ би се склучил во крајна нужда, во случај работите толку да се влошат што ќе биде доведена во прашање стабилноста на денарот. Доколку економските состојби се стабилизираат, Владата најави дека е можно наесен да повлече 77 милиони долари од ММФ, без склучување формален аранжман.