Претходен број

За Македонците добар живот се парите и здравјето, љубовта не е меѓу приоритетите

Истражување „Што значи добар живот“ на агенцијата ГФК во кое беа анкетирани 1.050 граѓани

Маја Томиќ

За македонските граѓани, најважни фактори за добар живот се финансиската сигурност, односно вработувањето и доброто здравје. Овие два аспекта, во драстично поголем процент од останатите, граѓаните ги наведуваат како основни елементи на она што за нив претставува добар живот.

Дури 87 отсто од граѓаните ја идентификуваат финансиската сигурност со доброто живеење, а за 82 процента добриот живот значи добро здравје. Далеку помалку, или само 20 отсто, сметаат дека децата се основата за добар живот, за 15 отсто тоа е среќниот брак, а 13 проценти сметаат дека поседувањето сопствен дом значи и добар живот.

Најмал број од граѓаните, или околу 10 отсто, мислат дека патувањата, доброто образование и поседувањето луксузен автомобил се причини за добар живот. Додека само еден до два процента од граѓаните мислат дека слободното време, љубовта и среќата, културата и уметноста, се битни за добар живот.

Ова се дел од резултатите на истражувањето „Што значи добар живот“ кое го направи агенцијата ГФК од Скопје во март годинава на репрезентативен примерок на 1.050 граѓани, постари од 15 години.

Анкетата покажала и дека кај граѓаните на возраст меѓу 25 и 44 години, како и кај самовработените лица, најмногу се избалансирани мислењата за тоа што е добар живот, односно дека тие обрнуваат внимание на повеќе различни компоненти на живеењето.

Најголем процент од помладите, учениците и студентите, како и пензионерите, сметаат дека добрата здравствена состојба е поважна за квалитетот на нивниот живот отколку финансиската состојба. Според резултатите, за студентите од 19 до 24 години, за разлика од другите групи граѓани, веднаш по здравјето и финансиската состојба, следуваат како важни можноста за повеќе патувања (16 отсто) и доброто образование (13 отсто). Додека, пак, за 12 отсто од учениците на возраст од 14 до 18 години, за добар живот е потребно добро образование. Десет проценти од нив сметаат дека поседувањето модерни електронски апарати значи и добро живеење.

Најпрецизни податоци од истражувањето се добиени од пензионираните граѓани. За 80 отсто од нив, добар живот е добро здравје, додека за 60 отсто од пензионерите на второ место се финансиската состојба, децата и поседувањето сопствен дом. На крајот, како помалку важни за доброто живеење се среќниот брак, доброто образование и поседувањето модерни елект��онски апарати.

За жителите од Скопскиот регион, за разлика од оние од североисточниот, значаен фактор за добар живот е поголемиот број патувања. Така мислат повеќе лицата од машкиот пол отколку од женскиот. Исто така, важен податок е што за граѓаните на возраст меѓу 25 и 34 години и самовработените лица, еден од поважните аспекти што го прават животот добар е слободното време. Така се изјасниле 10 отсто од оваа група граѓани. Само за 9 проценти од граѓаните кои живеат во Скопскиот регион, среќниот брак и поседувањето сопствен дом се битни елементи за добар живот, за разлика од 28 отсто од граѓаните од северозападниот и источниот дел од земјава кои сметаат дека овие фактори се значајна основа за добар живот.

Македонските граѓани, се констатира во анкетата, кога станува збор за доброто и квалитетно живеење, првенствено се фокусирани на основните животни аспекти, а многу помалку на факторите кои го подигнуваат животот на повисоко културно и духовно ниво. Ова, најверојатно, се должи на општата социјално-економска ситуација во земјата, која граѓаните ги поставува во позиција, пред се', да бараат начини да ги задоволат основните животни потреби, а на другите аспекти да им посветат внимание, онолку колку за тоа имаат време, пари и енергија.

Групацијата ГФК е една од водечките меѓународни компании за истражување на пазарот, таа е на трето место во Европа и четврта во светот. Има повеќе од 115 канцеларии, во над 90 земји, со приближно 10.000 вработени.